Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!

Caroline Grace: ‘Afrisaam is ’n droom wat waar geword het’

FOTO: Verskaf

Met haar fluweel stem gaan Caroline Grace vanjaar se Afrisaam Fees-feesgangers bekoor met van haar gewildste treffers.

Ons het gaan inloer om te hoor waarna sy die meeste uitsien.

LEES OOK: Afrisaam Fees vier vanjaar weer Afrikaans

Hoeveelste keer is dit vir jou by die Afrisaam Fees?

Dis my heel eerste keer by die Afrisaam Fees.

Wat beteken die Afrisaam Fees vir jou?

Ek het laas jaar net gedroom om by die Afrisaam Fees te kan sing! Nou is dit definitief ’n droom wat waar geword het.

Wat beteken Afrikaans vir jou?

Afrikaans beteken vir my trots, oorwinning en hoop.

Waarom dink jy is dit belangrik om feeste in Afrikaans te hê?

Dis uiters belangrik, dis deel van ons kultuur en passie, dis waar ons nog voel ons behoort, dis tradisie, dis wat ons ken, waar ons net kan wees! Wat sal ons sonder pannekoek, sosaties, biltong en boereworsrolletjies op die ritme van Kaptein span die seile maak? Dis ons kunstenaars se behoud, dis by feeste waar ons persoonlik met ons ondersteuners kan kontak maak en die geleentheid kry om ons droom uit te leef.

Waarna kan feesgangers uitsien wanneer jy op die verhoog is?

Iets van als! Ek is mal oor die verhoog en gee 100% van begin tot einde! Liedjies vanaf my album Eindelose Liefde, bekende treffers en dalk iets van ’n bekende film. Hopelik kan ek ’n paar harte bekoor.

Noem drie moet hê items vir ’n fees.

Wet wipes, gemaklike skoene en kontant.

Het jy enige boodskap aan diegene wat nog nie kaartjies gekoop het nie?

Mens leef net eenkeer! Koop daai kaartjie, vergeet van jou dieet en enige sorge, skop jou skoene uit en kom dans in Afrikaans saam met ons!

Die fees word vanjaar op 8 Junie 2019 op die gronde van die Old Boys Soccer Club aangebied.

Die Afrisaam Fees word aangebied met The Marketing Zoo as bemarkingsvennoot en Afrikaanse Musieknuus as aanlyn mediavennoot.