Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!

Afrisaam Fees vier vanjaar weer Afrikaans

FOTO: Verskaf

“Top klas Afrikaanse musiek, heerlike feeskos en ’n veilige kindertuin waar die kinders die dag kan spandeer terwyl die ouers lekker kuier,” só sê die organiseerders van die jaarlikse Afrisaam Fees wat vir ’n vyfde keer aangebied word.

Vanjaar se fees wat op Saterdag, 8 Junie 2019 gehou word huisves weer eens die immergewilde Steve Hofmeyr. Dirk van der Westhuizen, Juan Boucher, Bobby van Jaarsveld, Chrizaan, Arno Jordaan, Caroline Grace, Arno van der Hoff, Alida en Die Kontrak se Ivan Roux en Demi Lee Moore sal ook op die fees te sien wees.

Pieter Koen, wat ’n verrassing of twee saam bring, en Henry Bruinette sal as seremoniemeesters op die fees optree.

Daar’s ook hope pret en plesier met kindervermaak vir oud en jonk – ’n nuutjie op die feesprogram.

Dié fees bied ’n platform vir Afrikaans waar álle Afrikaanse kunstenaars welkom is. “Dis ’n platform om ons herkoms en identiteit te vier. Ons wou ook weer lewe in dorp blaas, aangesien die dorp baie stil was, en geen vermaak aangebied is nie,” het Lianné Barnard, een van die organiseerders, gesê.

Benewens al die musiek en ander feestelikhede kan feesgangers ook uitsien na sowat 50 stalletjies – van heerlike eet- en drinkgoed tot handgemaakte produkte. “Ons hoof doel is om mense wat van hul eie handewerk afhanklik is vir ’n inkomste, ’n platform te gee om te verkoop,” vertel Lianné verder.

Hierdie jaar kry die fees ook ’n nuwe tuiste en sal op die gronde van die Springs Old Boys Club plaasvind. Dit is geleë, op die hoek van Hobok en GilGilweg, Pollak Park. Daar is ook hope spasie en veilige parkering.

Die Afrisaam Fees is ’n Afrikaanse saamstaan en saamdans makietie. Ons kom saam, om in ons taal, ons musiek, ons herkoms en ons toekoms te vier. “Ons het ’n pragtige taal en dit is hartseer hoe ons taal onderdruk word en verengels word. Ons het dus ’n fees geskep waar Afrikaners kan saamkom (dit is waar Afrisaam vandaan kom) en hul taal en kultuur kan kom vier!”

Kaartjies vir die vyfde Afrisaam Fees kos R180 vir volwassenes en hoërskool kinders. Laer- en voorskoolse kinders kry gratis toegang. Kaartjies is beskikbaar by www.afrisaamfees.co.za of by die feeskantoor op Springs. Vir meer inligting stuur ’n e-pos aan kaartjies@afrisaamfees.co.za of skakel 076 928 6921.

Die Afrisaam Fees word aangebied met The Marketing Zoo as bemarkingsvennoot en Afrikaanse Musieknuus as aanlyn mediavennoot.