Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!

Grootste Piekniek & Musiek-konsert sluit seisoen op hoë noot af

Ná ’n massiewe en oorweldigende aanvraag, en die reuse sukses van die eerste twee Piekniek & Musiek konserte (met onder andere Elvis Blue en Theuns Jordaan), asook die derde produksie wat reeds uitverkoop is (met Die Heuwels Fantasties, Refentse & Jo Black wat op Sondag, 4 Maart plaasvind), het die organiseerders hierdie week ’n groot verrassing aangekondig.

Daar sal inderdaad ’n vierde en laaste Piekniek & Musiek plaasvind voor die seisoen verby is – hierdie keer met niemand anders as Dewald Wasserfall, Touch of Class en Monique Steyn nie – almal wat een verhoog sal deel op Paassondag (1 April 2018).

“Met die gewildheid van Afrikaanse musiek en die passievolle manier hoe Suid-Afrikaners hierdie kunstenaars ondersteun, het ons geweet dat die konserte goed ondersteun sal word – of so het ons gehoop. Wel, die manier hoe die plaaslike gemeenskap ons verwagtinge ver oortref het, sommer baie ver, het ons sprakeloos gelaat. So na bietjie kopkrap, onderhandelinge en ondersteuning van borge is ons verheug om inderdaad ’n vierde konsert te kan aanbied,” sê Ian Bredenkamp, stigter en organiseerder van Piekniek en & Musiek.

Bredenkamp voeg by: “En dan is dit boonop Paasnaweek. Wat kan nou meer spesiaal wees as om gehalte familietyd saam deur te bring, terwyl jonk en oud vermaak word deur kunstenaars wie se vrystellings almal in die top tien verlede jaar was. As ’n verdere bonus kan die jongspan maar gerus verwag dat daar ’n paar paaseier verrassings op hul gaan wag.”

Piekniek & Musiek met Dewald Wasserfall, Touch of Class en Monique Steyn sal weer eens by die gewilde Zevenwacht Wynlandgoed in Kuilsrivier plaasvind. Dié lieflike piekniek-area sal reeds vanaf 12nm beskikbaar wees wanneer die hekke open, en liplekker piekniek-pakkies kan ook vooraf bestel word. Verder sal daar ook eie verskeie kostrokke, stalletjies met lekkernye en drankies om van te kies en te keur beskikbaar wees. Die gewilde kunstenaars sal teen 5nm op die verhoog verskyn.

Kaartjies is nóú beskikbaar teen slegs R170 vir volwassenes, R75 vir kinders tussen 3 en 12 jaar oud, en die aanhangers jonger as 3 kan hul sitplek gratis inneem. Kaartjies is by Pick ’n Pay of deur Webtickets beskikbaar.

Die geleentheid word met trots aangebied deur kykNET en Ian Bredenkamp Media.

Gesels ook gerus verder saam op sosiale media (PiekniekenMusiek). Kontak vir Ian Bredenkamp by ian@ianbredenkampmedia.com indien jy enige verdere vrae het.