Die eerste Piekniek & Musiek-konsert is byna uitverkoop. Dié konsert, met Elvis Blue en Tarryn Lamb as openingskunstenaar, vind 12 November plaas.
“Afrikaanse musiek is ongelooflik gewild, en ek is bly ek kan konserte soos dié vir musiekliefhebbers reël. Ons het nie sulke Sondag-opsies in die Noordelike voorstede nie,” sê Ian Bredenkamp, organiseerder van die Piekniek & Musiek-konsertreeks.
Piekniek & Musiek is die geleentheid van die jaar met unike konserte op die grasperk van die Zevenwacht Landgoed in Kuilsrivier. Die konserte vind in die middae plaas en sal teen sonondergang reeds klaar wees. Van Suid-Afrika se top kunstenaars gaan die klankbaan vir jóú Sondagmiddag verskaf.
Bespreek jou piekniekmandjie, bring ’n kombers en geniet die ongelooflike atmosfeer. Die venue is kindervriendelik en het selfs klimrame vir die jongspan.
Elvis Blue gaan van sy grootste treffers opvoer vanaf sy nuwe album, Die Brug. Dié album pronk reeds met die Bokkie-toekenning vir album van die jaar asook die OFM-toekenning vir album van die jaar. In 2016 het Elvis ook geskiedenis gemaak met die meeste Ghoema-toekennings.
Die volgende konserte vind plaas op 4 Februarie met Theuns Jordaan en 4 Maart met Jo Black, Refentse en Die Heuwels Fantasties.
Geen kos en drank mag ingelaat word en geen sambrele en kampstoele. Bestel jou piekniekmandjie vooraf by WebTickets.
Kaartjies wissel tussen R60 en R140 en is beskikbaar by WebTickets. Hekke open om 14:00 en die konsert skop 16:00 af.
Piekniek & Musiek word met trots aangebied deur 28 Black – The Better Energy Drink in samewerking met kykNET, Bok Radio en Ian Bredenkamp Media. Vir meer besonderhede besoek www.piekniekenmusiek.com.