FOTO: Verskaf
Op 16 November gaan die Kaap behoorlik sy litte losmaak by die jaarlikse Liefde by die Dam piekniek-styl konsert by Meerendal. Elf bekende Suid-Afrikaanse kunstenaars en groepe gaan vanjaar die verhoog behoorlik laat vlamvat: Die Heuwels Fantasties, Francois van Coke, Early B, Arno Carstens, Majozi, Karlien van Jaarsveld, Snotkop, Spoegwolf, Tasché, Lukraaketaar en Loki Rothman. Ons gesels met Arno Carstens oor nuwe musiek en wat konsertgangers van sy optrede kan verwag:
Wat kan fans verwag van jou Liefde by die Dam-optrede?
’n Melodiese avontuur van musiek geskryf oor ’n tydperk van 24 jaar, so die beste wat ek in 45 minute kan druk vir jou genot.
LEES OOK: Liefde by die Dam kom binnekort weer na die Moederstad
Ons hou baie van jou album Die Aandblom13. Is daar planne vir nog nuwe Afrikaanse musiek?
Yes, ek het die volgende Afrikaanse album klaar geskryf, maar ons sal begin record vroeg 2020. So die tyd volgende jaar sal hy al uitwees. Ek is baie excited daaroor. Aandblom13 was verbasend goed so ek voel ’n bietjie persoonlike presure om die volgende een beter te maak, maar gelukkig omring ek myself met baie goeie producers en musikante, so kom ons kyk.
Vertel ons van jou skryfproses. Besluit jy, jy gaan nou sit en skryf? Of vind die liedjies jou enige tyd, enige plek?
Die idees kom maar die heeltyd. Ek maak voice notes dan skryf ek die voller weergawes wanneer ek tyd kry. Ek het ’n 100 idees, maar dis die 10 beste songs wat saam met my die lang pad slaan.
Wat is die beste raad wat iemand jou ooit gegee het?
Ek het my beste raad in die spieël gekry. Maak vrede met jou innerlike self vandaar af kom ’n eerlikheid wat jou sal tyd en trane spaar.
Wat is die slegste raad wat iemand jou ooit gegee het?
James Small het vir my jare terug gesê: “Alle media is goeie media”. Well, for each to their own, maar bad vibes is nie die moeite werd vir my nie .
Wat is die vreemdste ding wat al tydens n optrede gebeur het?
Ek het een keer vir Charlize Theron en Sean Penn en hul vriende ’n birthday show gegooi. Soos hul ons talent op stage bewonder het kon ek nie help om te dink dis ’n ‘staring’ kompetisie tussen plaaslike musikante en Hollywood superstars nie. Baie surreal.
Wat is vir jou die hoogtepunte van jou loopbaan sover?
Die eerste keer wat jy jou song op die radio hoor, jou eerste SAMA. Al die eerste kere, daarna raak “longevity” in dit self jou hoogtepunt.
Jy is ook ’n visuele kunstenaars. Waar het hierdie liefde onstaan?
Vir my loop alle vorme van kuns hand aan hand. Ek paint al my hele lewe lank, maar nou maak ek meer tyd daarvoor. Dis alles deel van die innerlike uiterlike struweling om ’n skildery of song te skep waarmee jy kan saamlewe.
Liefde by die Dam vind 16 November by Meerendal in Kaapstad plaas.