Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!

Proe’toria bied weer wyn, kos en vermaak uit boonste rakke

FOTO: Verskaf

Daar is nie ’n beter manier om die lente af te skop as met ’n uitstappie wat die hele gesin sal geniet nie.

Suid-Afrika se grootste proe- en vermaakfees, Proe’toria, is terug en hierdie jaar gaan dit nog groter en beter wees as ooit tevore. Nie net kan feesgangers vanjaar uitsien na die beste kos-, lekkerny-, kuns-, jenewer-, kunsbier- en wynstalletjies nie, maar ook na die grootste name in die musiek- en kosbedryf op een verhoog.

Die Pretoria Nasionale Botaniese Tuine sal op 31 Augustus 2019 die tuiste wees van een van die lekkerste en grootste buitelugfeeste wat Gautengers nóg ervaar het.

“Hierdie jaar beloof om die beste Proe’toria ooit te wees. Oudergewoonte sal daar meer as ’n honderd verskillende kos- en drankstalletjies wees, asook hope vermaak vir die kinders en topklas kunstenaars op die verhoog,” vertel EPH Group se Leon Pheiffer. “Hierdie jaar word daar meer klem geplaas op die ‘proe’ van Proe’toria. Die stalletjie-eienaars gaan so gaaf wees om feesgangers die geleentheid te gee om hulle kos, drankies en lekkernye te proe. ’n Paar bekendes in kosmaakwêreld gaan ook hulle beste kosmaakgeheime op die verhoog kom deel. Daar gaan ook een groot wyntent wees, waar wynliefhebbers kan saam kuier.”

Wynplase en uitstallers, van regoor die land, gaan deel wees van dié geleentheid en sluit verskaffers in soos Dors Water, The Java House, The Pizza Wagon,Foodboyz, Mainstream Brewing Company, Lekker Spookasem en vele meer.

Buiten vir die eet- en drinkgoed, kan die publiek kan ook daarna uitsien om gedurende die dag vermaak te word deur bekendes soos Dewald Wasserfall,Roan Ash, Demi Lee Moore, Corlea, Touch of Class, Joe Foster, Georgetown, Jemma, Deevah en Karlien van Jaarsveld. “Dis vir my alles waarvan ons Suid-Afrikaners hou op een plek saamgevat. Lekker eet, lekker drink en lekker vermaak. Sien julle daar,” voeg Ruhan du Toit van Touch of Class by oor die vierde jaarlikse Proe’toria-fees.

Deur deel te wees van dié spesiale dag, doen jy ook jou deel vir liefdadigheid, omdat van die fondse op die dag geskenk sal word om ’n diereorganisasie te help met die wonderlike werk wat hulle vir hawelose diere doen.

Feeshekke sal om 09:00 op die dag open en die vermaak sal tot 20:00 aanhou. Kaartjies is nou reeds beskikbaar vir diegene wat vinnig spring en gebruik wil maak van die spesiale vroeëbesprekingsaanbod (geldig tot 30 Junie 2019) op Tixa. Toegang vir kinders onder agtien is R80 en volwassenes wat nou bespreek, sal slegs R120 per persoon betaal. Die gewone prys vir aanlynbesprekings sal R150 per volwassene en R100 per kind beloop en op die dag sal kaartjies teen R180 per volwassene en R120 per kind verkoop.

Proe’toria word trots aangebied in samewerking met EPH Events.

Kom sluit die winter op ’n hoë noot af en bederf jou gesin of vriendegroep met ’n prettige uitstappie wat hulle vir nog baie lank sal onthou. Dit is immers nie elke dag wat jy die kans kry om die beste kos, drank en vermaak op een plek raak te loop nie!