Luister na Joe Foster se ‘hartklank’ op Liggiefees

FOTO: Verskaf

Vat die ‘pad’ na die jaarlikse Jakaranda Kinderhuis Liggiefees, wat vanaf 1 tot 31 Desember op die gronde van die Jakaranda Kinderhuis in Pretoria, plaasvind en kom luister na Joe Foster se ‘hartklank’. Hy gesels met ons oor sy betrokkenheid by dié fees en meer:

LEES OOK: Dis weer tyd vir die Jakaranda Kinderhuis Liggiefees

Waarom het jy besluit om betrokke te raak by die Jakaranda Kinderhuis se Liggiefees?
Ek glo werklik in die konsep en dit werk, so ek was jaloers dat ek nie ook deel kan wees nie… en, ‘one thing lead to another’…

Waarna kan feesgangers uitsien wanneer hul na jou optrede kom kyk?
Ek sing al my gunstelinge soos Pad Na Jou Hart, Vir My Gemaak, In Die Reën, Ridder, Look Away, en vele meer, maar ek sing ook natuurlik van my gunsteling-splinternuwe liedjies wat op my nuwe album Volgende Stap is. Wees van die eerstes wat dit live hoor. My nuwe album sal ook daar vir slegs R100 beskikbaar wees.

Deel asb. met ons jou mooiste herinneringe.
Daar’s te veel om te noem, en die helfde van hulle was as ek op die verhoog was.  

Watter boodskap van hoop het jy aan die kinders in dié Kinderhuis?
Elke oomblik in ons lewens is kosbaar, al is elke oomblik nie na wense nie het ons nog steeds ons Vader, die bron van hoop, wat ons die krag gee om ’n nuwe môre te skep met nuwe denke. Die manier hoe ons na iets kyk is die manier hoe ons dit sien. Ons het die keuse. As jy dit kan indink en voorstel in jou gedagtes dan is dit moontlik. Geloof is om te aanvaar waar ons nou is en daar in daai oomblik te weet môre is in die hande van die Here wat jou goeie perspektief nodig het om dit te laat realiseer. As jy hoop dan moet jy weet dat dit direk van God af kom. Dit is die stroom van lewe. Ons moet net met daai stroom gaan waar Hy ons lei.  

Waarom moet mense ’n kaartjie koop?
Baie van ons wil altyd ’n verskil maak as iemand ons vra wat wil jy doen met jou lewe, partykeer is dit die klein bekostigbare goed soos ’n kaartjie koop na die Liggiesfees wat die verskil werklik maak.

Die fees kan daagliks vanaf 18:00 tot 22:00 besoek word en op konsertdae sal hekke reeds om 17:00 open. Kaartjies sal by die hek beskikbaar wees teen R30 per persoon.