FOTO: Verskaf
Die sangeres Sharoney is vanjaar deel van die Jakaranda Kinderhuis Liggiefees wat vanaf 1 tot 31 Desember op die gronde van die Jakaranda Kinderhuis in Pretoria plaasvind. Ons het gaan aanklop en met haar gaan gesels:
LEES OOK: Dis weer tyd vir die Jakaranda Kinderhuis Liggiefees
Wat is jou mooiste Kersherinnering?
Ek sal nooit vergeet hoe ons een jaar almal as een groot familie in die mooie Kaap gaan vakansie hou het en sommer almal saam Kersfees gevier het nie. Van oupa, ouma, pa, ma, ooms, tannies, kinders, niggies en nefies – almal bymekaar. Ons het selfs ’n Kersvader gehad. Dit was die beste Kersfees ooit. Almal kinderlik opgewonde vir Kersvader om ons geskenke te kom aflaai. ’n Onvergeetlike vakansie en kersfees in die Kaap.
Hoekom moet mense na jou vertoning by die Jakaranda Kinderhuis Liggiefees kom kyk?
My vertoning is energiek belaai, musiek vir almal en stories van persoonlike ondervinding en lewens gebeure om alles bymekaar te sit. Ondersteuners kan ook verwag om ’n prys of twee te wen by my vertoning. Boonop is dit vir ’n goeie doel en alle fondse gaan ten bate van die kinderhuis. Wat kan lekkerder wees?
Waarom is dit belangrik vir kunstenaars om betrokke te raak by sulke liefdadigheid instansies?
Dis altyd lekker om aan die gemeenskap terug te gee. Kinders is iets wat my baie na aan die hart lê en ek is seker elkeen het ’n sagte plekkie vir liefdadigheid.
Watter boodskap van hoop wil jy oordra aan die kinders in die huis?
Droom groot, moet nooit toelaat dat die wêreld jou onder kry nie, drome is wense wat jou hart maak as jy slaap. Jy is uniek, en dis wat jou laat skyn so gebruik dit om jou drome te bewaarheid. As iemand vir jou sê jy kan nie, gebruik juis dit om hulle verkeerd te bewys. Jy is sterker as wat jy dink…
As jy die fees in een sin moet opsom, wat sal dit wees?
Liggies is iets wat skyn, iets wat almal kan sien, daarom is die liggiefees die ideale geleentheid om te skyn!
Die fees kan daagliks vanaf 18:00 tot 22:00 besoek word en op konsertdae sal hekke reeds om 17:00 open. Kaartjies sal by die hek beskikbaar wees teen R30 per persoon.