Die gewilde Madeliefie Makietie-fees wat vanjaar op die pragtige Weskus-stranddorp Strandfontein plaasvind, ontlok groot opgewondenheid in die Matzikama-streek.
Vanjaar se fees vind op Vrydag 29 en Saterdag 30 September plaas en sluit 15 van ons land se top kunstenaars in, met onder andere Bobby van Jaarsveld, Willem Botha, Die Broers, Pieter Koen, Andriëtte, Leah, Brendan Peyper, Lianie May, Juanita du Plessis, Jay, Neil Somers, Klikkerland, Lollos en Dobbelsteun en Lee Scott.
“Ons is trots om besoekers van buite op ons spog kusdorpie te verwelkom en vanjaar bied ons vir ieder en elk die geleentheid om die fees te kom beleef. Ons Weskus-mense is bekend vir ons gasvryheid en ons unieke Weskus kos en wyne sal besoekers in vervoering hê,” sê Stokkies van Zyl, organiseerder van Madeliefie Makietie.
“Vanjaar bied die fees ook ’n spesiale vertoning in die bekende Perdeskoen-arena aan. Die arena sal volgepak wees met die heerlikste kosstalletjies, ons Olifantsrivierstreek se unieke wyne en natuurlik die beste musiek. Vanjaar het ons ook spesiaal gefokus op die jongspan en Klikkerland en Lollos sal seker maak dié Septembervakansie skop met groot pret en vermaak af.”
Die fees bied soos vroeër jare ’n bekostigbare pendeldiens na en van die feesterrein, met trots geborg deur Stevens Transport en omliggende skole. Indien jy jou kaartjie by Computicket gekoop het, mag jy gratis van dié pendeldiens gebruik maak. Kaartjies sal binnekort eersdaags wees.
Die A-blok-kampeerterrein op Strandfontein word deur die fees-organiseerders, in samewerking met die Matzikama-munisipaliteit, herstel en opgeknap vir die fees.
Indien jy vanjaar jou eie stalletjie by die fees wil hê en jou kunswerke, kookkuns, handwerk en vele meer wil verkoop, kan jy ’n aansoekvorm op die webblad invul of jy kan ’n e-pos stuur aan marianae@kingsley.co.za.
“Ons visie en doelwit is steeds soos elke jaar om ’n vriendelike en veilige, familiefees aan te bied. Daarom het ons seker gemaak daar is iets vir jonk en oud – van ’n Maltrap-fietsroete, ’n staproete, die baie gewilde raakrugbywedstryd en nog vele meer,” vertel van Zyl verder.
Bly op hoogte van die jongste Madeliefie Makietie-nuus op Facebook, Twitter en Instagram.