KKNK-feesgangers sal verheug wees om te hoor dat opelug musiekaande terugkeer na die Rivierbuurt. Dié fees vind plaas vanaf 8 tot 15 April op Oudtshoorn.
’n Weekkaartjie bied jou toegang tot die Rivierbuurt, ’n heerlike kuierplek vir jou hele familie. Kuns- en kosstalletjies is volop, proe heerlike wyne en deli-happies in Liplekker en ontsnap van die Oudtshoorn-hitte by ’n kroeg of rusarea.
Smulkos word bedien by die feesrestaurant in Hap-en-Tap. Jou kaartjie bied ook toegang tot die opelug aandvertonings op Die Huisgenoot-verhoog, wat vir die eerste keer sedert 2012 in die Rivierbuurt te sien is.
Met dié kaartjie sien jy gunstelinge soos Juanita du Plessis, Kurt Darren, Dr. Victor, Theuns Jordaan, Emo Adams, Bobby van Jaarsveld, Rhema Varrie, Leah en vele meer. Golden Circle-kaartjies is beskikbaar vir 8 April, 9 April, 14 April en 15 April, maar ’n Golden Circle-kaartjie bied nie toegang tot die Rivierbuurt nie.
Só lyk die Huisgenoot-verhoog se aandprogram:
Juanita, Bok en Vriende: 8 April, 17:30
Koop jou kaartjies hier.
Juanita du Plessis is vir die eerste keer in sewe jaar terug by die KKNK. Saam met Bok van Blerk wat in 2016 sy tiende jaar in die musiekbedryf gevier het, The Black Ties en nuwelinge, Jo Black, Elandré Schwartz en dubbelplatinumverkoper,
Refentse sorg hulle vir ’n heerlike kuieraand onder die Klein Karoo-sterre.
Theuns Jordaan en Dr. Victor: 9 April, 18:30
Koop jou kaartjies hier.
Theuns Jordaan en Dr. Victor & The Rasta Rebels, wat onlangs hul nuwe enkelsnit vrygestel het, is terug by die KKNK. Dié kunstenaars, wat saam by Afrikaans is Groot in 2012 opgetree het, sorg vir ’n onvergeetlike aand.
Nicholis, Elizma, The Rockets en Brendan: 10 April, 18:00
Koop jou kaartjies hier.
Nicholis Louw en Elizma Theron, is deel van die groep 4Werke wat onlangs hul nuwe album, 4Warm vrygestel het. Brendan Peyper, wie se album onlangs goue status bereik het en The Rockets is ook op die verhoog.
Emo, Kurt, Karin en Robin: 11 April, 18:30
Koop jou kaartjies hier.
Die Jou Show-aanbieder, Emo Adams, Kurt Darren wat onlangs sy jongste album ‘Sal Jy Met My Dans’ vrygestel het, Karin Kortjé en die The Voice South Africa-deelnemer Robin Pieters is op die verhoog vir ’n onvergeetlike aand in die Rivierbuurt.
Bobby en Rhema: 12 April, 18:30
Koop jou kaartjies hier.
Die Voice South Africa-mentor, Bobby van Jaarsveld en die Idols SA-wenner, Rhema Varrie sorg vir ’n aand wat jy beslis nie kan misloop nie. Beleef hierdie vertoning saam met ons in die Rivierbuurt.
Rymklets van Oos tot Wes: 13 April, 18:30
Koop jou kaartjies hier.
Beleef hip-hop in die Klein Karoo met van ons land se voorste kunstenaars en die wenners van die Oudtshoorn hip-hop-toekennings. Dit is die vyfde keer dat Rymklets van Oos tot Wes by die KKNK aangebied word en beloof om jou weg te voer na ’n ander persepsie oor dié kunsvorm en die kultuur van hip-hop in Suid-Afrika.
kykNET Jukebox: 14 April, 18:30
Koop jou kaartjies hier.
Die gewilde kykNET-program, Jukebox, kom na die KKNK. Beleef ’n aand vol heerlike musiek deur jou gasheer, Pieter Koen, wat onlangs sy nuwe album vrygestel het. Die groep BlackByrd, Refentse, Jay, die borrelende Leah en Willem Botha sluit by hom aan.
Kleurvol: 15 April, 18:30
Koop jou kaartjies hier.
Jong kunstenaars kry die geleentheid om onder mentorskap van Bouwer Bosch en Leandie du Randt Bosch hulle talente ten toon te stel in dié afsluitingskonsert vir KKNK23. Die bekende regisseur en Fiësta-wenner, Nico Scheepers behartig die aand se regie.
Die volledige program is hier beskikbaar. Kaartjies kan by Computicket, Shoprite/Checkers en House & Home gekoop word. Verblyfbesprekings kan aanlyn gedoen word, of kontak 044 203 8600.