Liefde by die Dam is terug; kaartjies nou te koop!

FOTO: Verskaf

Vir die afgelope twee jaar het die pandemie alle konserte gekelder, maar nou is dit gelukkig weer tyd om die hekke wyd oop te swaai en te laat waai! Liefde by die Dam is een van daardie feeste wat musiefliefhebbers op hul kalender in rooi merk. “Next level”, soos die outjies in die voorste ry dit noem. Groot name op een van die grootste musiekverhoë in die land. Die program sorg vir die heerlikste musiek vir jonk en oud – ’n ideale dag uit saam met jou vriende en familie. 

Die Heuwels Fantasties, Francois van Coke, Appel, Elandré, Demi Lee Moore, Refentse, Bernice West, Robbie Wessels, Youngsta CPT en Schalk Bezuidenhoudt maak uit van dié sterblaaide program vir Sondag, 3 April 2022 by die Emerentia Dam in Johannesburg en Saterdag, 9 April 2022 by die Merendal Wynlandgoed in Kaapstad. 

Pierre Greeff van Die Heuwels Fantasties, wat ook die mede organiseerder van Liefde by die Dam is, sê dat dit vir hulle belangrik is om ’n platform te skep waar die beste van die Suid-Afrikaanse musieklandskap aangebied kan word. “Ons kies kunstenaars wat ons wéét die verhoog behoorlik sal laat vlamvat. Ons is baie gelukkig dat almal op ons A-lys ingestem het. Feesgangers kan verwag om hulle persoonlike gunstelinge te sien optree met net die heel beste klank op ’n groot verhoog! Ons begin nou al werk en haal alles uit om vir almal wat saam kom by die onderskeidelike konserte, een van die beste feesdae ooit te kan gee.”

Die gewilde komediant en akteur Schalk Bezuidenhout is vanjaar die seremoniemeester by beide konserte. Bezuidenhout wat ons met sy “feeling good, feeling positive!” sosiale media inskrywings vermaak sedert die grendel-tydperk in 2020 begin het, vertel dat mense ’n “grote kan verwag!” “Hierdie kunstenaars is honger om te perform! En ons weet die mense is ook honger vir ’n hell of a show,” het hy gesê.

Francois van Coke tree vanjaar by die Johannesburg konsert op en sê dat hy baie bly is oor dié aankondiging. “Ek is van die begin af deel van die Liefde by die Dam-familie. Ek kan nie wag om weer op hierdie ongelooflike verhoog te staan nie. Sien julle daar; ek kan nie wag nie!”

Kaartjies:

Bespreek jou kaartjies by www.liefdebydiedam.co.za

Algemeen: R295.00

Liefde kaartjies: R495.00 (dubbelkaartjie vir twee)

VIP areas met gratis kroeg, sitplekke en sambrele. Maksimum 30 mense – beskikbaar teen R40 000. 

Kom deel in ’n heerlike, gesellige musiekdag by die dam – bring piekniek mandjies. Daar sal ook ’n verskeidenheid kosstalletjies wees.