Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!

Aitsa Afrikaanse Musiektoekennings: Dís wie optree!

FOTO: Verskaf

Pretoria FM het getrou aan sy leuse: Hoop, Glo, Leef in Afrikaans besluit om vanjaar op ’n besondere wyse erkenning te gee aan Afrikaanse kunstenaars wat deurlopend ’n uitstekende bydrae tot die kunste in die land lewer met gehaltemusiek, -lirieke en -produksies. 

Ná deeglike beplanning en verskeie vergaderings het platemaatskappye soos Coleske Artists, Vonk, Universal, Sony en Inhoud Huis hulle ondersteuning aan die geleentheid verleen en gaan ’n wêreldklasvertoning op 16 Oktober by die Moreleta-ouditorium in Pretoria aangebied word!

Volgens die uitvoerende hoof van Pretoria FM, Hennie Koortzen, moet só ’n geleentheid spog met ’n unieke naam wat in Afrikaans uitstaan, ’n naam wat lof kan betuig, maar terselfdertyd kan verras en net in Afrikaans bestaan! En só ’n naam en woord is gevind… Die Afrikaanse Musiektoekennings sal as die Aitsa Afrikaanse Musiektoekennings bekend staan!

Dit is ’n nasionale geleentheid en om dit verder te laat uitstaan, word die beeldjies vir die toekennings deur ’n bekende beeldhouer ontwerp en gemaak. Die beeldjies sal ’n verrassing bly tot die aand van die geleentheid, maar die kunstenaars kan verseker weet dat elkeen graag met só ’n toekenning sal wil spog.

KLIK HIER OM OP HOOGTE TE BLY VAN DIE TOEKENNINGS

Tydens die geleentheid sal ere-toekennings oorhandig word aan ikone in die Afrikaanse musiekbedryf en spesiale gilde vir Afrikaanse Kuns en Kultuur sal ook bekend gestel word en baanbrekers sal vereer word. Uitstekende musiek-, klank- en produksiespanne, onder leiding van Rex van Deventer, is reeds besig om ’n uitmuntende vertoning saam te stel met van die land se beste Afrikaanse kunstenaars wat gaan sorg vir ’n skouspel van musiek, dans en kleur.

Kaartjies kos slegs R150 en is reeds by iTickets beskikbaar.

Adam Tas, Elandré, Nádine, Corlea, Elvis Blue, Pietman Geldenhuys, Danny Smoke, Demi Lee Moore, Ghapi, Ricus Nel, Kosie Beukes, Ruhan du Toit, Juan Boucher, Liezel Pieters, Snotkop, Dewald Wasserfall, Early B, Monique en Steve Hofmeyr tree tydens die spogaand op.