FOTO: Verskaf
Op Sondag, 4 Augustus 2019 kan konsertgangers ’n onvergeetlike dag by die Emmarentia-dam verwag. Liefde by die dam, vernoem na Valiant Swart se bekende trefferlied met dieselfde titel, bied elke jaar net die beste in plaaslike musiek aan. Dit is die perfekte dag vir saamkuier met musiek deur fenomenale, uiteenlopende kunstenaars in ‘n skouspelagtige omgewing.
“Goeie musiek deur van ons land se gunstelingkunstenaars, goeie geselskap en goeie kos in ’n gesellige omgewing dit is presies die dinge waarvan ons gemaak is. Die konsert het jaar na jaar bly groei en is nou een van die hoogtepunte op die Suid-Afrikaanse feeskalender – een wat duisende mense van regoor Gauteng en naburige provinsies lok. Ons is trots daarop om die amptelike radiovennoot vir Liefde by die dam in Johannesburg te wees en die hele Jacaranda FM-familie sal saam kom kuier vir ’n dag van pret en plesier in die Jozi son. Sien julle daar,” het Kevin Fine, die hoof uitvoerende beampte by Jacaranda FM, gesê.
Die 2019-program bestaan uit van Suid-Afrika se mees suksesvolle en buitengewone kunstenaars: Die Heuwels Fantasties en Francois van Coke, wat as twee van die gewildste Afrikaanse kunstenaars in die huidige SA Musiek-landskap beskou word, het verlede jaar die Liefde by die dam-gehoor op hul voete gehad en beloof dieselfde opwinding by vanjaar se konsert. Die super program sluit die lieflike, bekroonde sangeres Tarryn Lamb; die bekende alternatiewe rockgroep Spoegwolf, die legendariese Coenie de Villiers en die wêreldbekende, veelvoudige Grammy-wenners, Soweto Gospel Choir in. Bouwer Bosch en Lucinda Neethling het onlangs saam musiek begin maak en dit is pas aangekondig dat dié wonderlike duo vanjaar op die Liefde by die dam-verhoog te sien gaan wees. Die immergewilde Martin Bester sluit ook by die program aan en The Voice SA 2019 wenner, Tasché Burger, gaan ook optree. Daarbenewens is die talente van die dinamiese rap kunstenaar Early B en die skerp humor van Radio Raps die kersies op die koek om te verseker dat Liefde by die dam 2019, iets vir almal bied.
Early B laat weet dat fans gereed kan maak om “hulle biscuits te skud” vir sy optrede. “Dis altyd ‘n gevoel van opgewondenheid wat oor my kom as ek op ’n groot verhoog soos Liefde by die dam optree. Die reaksie en die vibe wat ’n skare my gee vir iets wat ek in ’n kamer geskryf het, is ongelooflik.”
Francois van Coke is weer vanjaar terug op die Liefde by die dam-verhoog: “Ek is baie bevoorreg dat ek en my band nog by elke LBDD gespeel het. So, ek ken die jol! Ek gaan songs speel van my solo loopbaan, maar ook ’n paar Fokofpolisiekar classics. Daar sal ook definitief collabs wees met Heuwels en Early B. Toe ek en my vriende saam begin musiek maak was die droom om die musiek voor mense te kan speel. Ons was net dudes in garage was iets wou doen. Om dit by ’n fees soos LBDD voor duisende mense te kan speel, in die buitelug, is die droom wat waar geword het.”
Charlotte Kanter, Liefde by die Dam se bemarkingsbestuurder sê dat hulle weer vanjaar kragte span met Bouwer Bosch en sy Liefde Wen span om na die afloop van die konsert komberse in te samel vir minderbevoorregtes. “Ons het verlede jaar meer as 1000 komberse ingesamel. Bring jou kombers en los dit na die konsert agter. Ons mikpunt vanjaar is 2000.”
Die verhoog en perseel by Emmarentia Dam is groter vir vanjaar se LBDD. Pierre Greeff van Die Heuwels Fantasties, en ook een van die organiseerders van die konsert, sê dat die span reeds hard aan die werk is om vir ’n onvergeetlike konsertervaring te sorg. “’n Buitelug vertoning het ’n spesiale sjarme. Ons het klomp musiek om te deel Maak gereed, dit gaan ’n enorme partytjie wees!”
Kaartjies vir Liefde by die dam op 4 Augustus is ongelukkig reeds uitverkoop!
Liefde by die dam word in trotse samwerking met Jacaranda FM, VIA, Huisgenoot, Netwerk24, Jo’burg City Parks en Twizza aangebied.