SAAMGESTEL DEUR REPUTASIE
Hierdie week het 27 snitte gedaal, vyf gestyg, vier onveranderd gebly, een snit het teruggekeer en daar is drie toetrdes tot die ranglys.
Dis Riaan Benadé se sewende week op nommer een met Spontaan. Dit het 133 536 kykbeurte die afgelope week ontvang – ’n styging van 8.1% teenoor die vorige week. Hy behou ook sy tweede plek met Vat ’n Bietjie.
Bernice West se nuwe musiekvideo vir haar enkelsnit, O Kind, is onlangs vrygestel en dié liedjie maak sy debuut op nommer drie. Nóg ’n debutant op nommer vier die week is Biggy en Early B se Peanut Butter.
Dit beteken dus dat Fatman se Vuil Coke met twee plekke na nommer vyf sak en Bernice West se Sonop-Blom na nommer ses. Boerepompie van Ricus Nel en Snotkop is op nommer sewe en Juan Boucher se Ek dink ek mis maar net jou hart sak tot by nommer agt.
Bernice West se Kom Binne skuif elf plekke op van verlede week se nommer 20 tot by nommer nege – Bernice is ook die eerste kunstenaar wat drie liedjies gelyktydig in die top-10 het.
Demi Lee Moore sluit die top-10 af met haar liedjie Maak my jou Tequila.
Hierdie is nuut op die ranglys:
- Elandré se Waar Die Wind My Waai maak sy debuut op nommer 23.
Hierdie liedjies is terug:
- Plus Minus Maal Deel van Liezel Pieters op is terug en die week op nommer 39.
Die Afrikaanse Musieknuus Top-40 werk op ’n statistiese barometer wat die hoeveelheid YouTube kyke per week meet. Die trefferlys se observasie periode is van Vrydag tot Donderdag elke week en dit is in lyn met internasionale standaarde.
