FOTO: Verskaf
Die Standard Bank Innibos Digitale-fees skop die komende naweek af en jy is verseker van die beste sitplek, maak nie saak waar in die wêreld jy jouself bevind nie!
Jy kan kies uit twintig produksies wat musiek, drama, komedie en kinderteater insluit. Sommige vertonings is uit die Innibos-argief, maar daar is ook splinternuwe produksies wat spesiaal vir Innibos Digitaal opgeneem is.
Innibos se feeskonserte is jaarliks ’n hoogtepunt tydens die kunstefees, en by Innibos Digitaal is daar drie van dié topkonserte te sien. Beleef die 2019 kykNET-Verjaardagkonsert, wat die Fiësta-toekenning gekry het vir die beste opelugkonsert verlede jaar, asook die 2019 JacarandaFM-konsert en Innibos is Groot, ’n opname van die baie gewilde 2014-hoofverhoogkonsert.
Dr Victor and the Rasta Rebels, Jak de Priester en Michelle Botha (Storm in ’n F-cup/Bra-vades) se vertonings is spesiaal vir Innibos Digitaal opgeneem.
Musiekteaterproduksies sluit in Stef Bos in Bos innie Bos, die tydloosheid van Koos du Plessis se musiek en liriek in Doep is nie dood nie met onder andere Jannie du Toit, terwyl Jannie Moolman en Kevin Leo in Crooners ou bekendes soos Dean Martin, Bing Crosby en Frank Sinatra na jou voorhuis bring.
’n Eerste in die Afrikaanse toneelbedryf is die digitale debuut Leengoed, met Tobie Cronjé en Wynand von Vollenstee. Moet dit nie misloop nie! Chris Vorster lewer ook ’n uitsonderlike solo-vertoning in Die hart verklap, terwyl hy meer komiese skoene aantrek in Manne saam met onder andere Hannes Brümmer.
Simon Bruinders bring Rainbow nation – ’n comic relief vir swaar tye na die fees, en in Die narre werklikheid onder regie van Albert Maritz sal jy lag én huil. Voorts is daar Annale van ’n windgat, Johny Klein vertel heerlike kontreistories in Pomporrelkonsert, en Elsabé Daneel en Wilken Calitz tower gedigte en musiek op in Rasende Ryme.
Vermaak die kleingoed met goeie kinderteater hierdie naweek: daar is Oom Karoolus en Lente, Felias en Pokkel en die immergroen Liewe Heksie en die Tuindwergie spesiaal vir hulle!
Stroming van Innibos Digitaal begin om 18:00 op Vrydag, 26 Junie. Kaartjies is reeds te koop by Computicket. Die vertonings bly vir 72 uur beskikbaar nadat jy die kaartjie gekoop het. As jy voor die 26ste jou kaartjie koop, begin jou 72 uur om 18:00 op die 26ste. Ander goeie nuus is dat die vertonings tot Desember vanjaar in die “biblioteek” sal bly – jy kan dus lekker lank feesvier!
Die volledige program is op innibos.co.za en op computicket.co.za. Dié fees vind vanaf 16 tot 19 Desember 2020 op Mbombela plaas.