FOTO: Verskaf
Ná ’n ongelooflike eerste seisoen, duisende inskrywings en ’n wenner wat die musiekindustrie gestormloop het, is Die Kontrak uiteindelik terug.
Vanjaar sal dié gesogte werklikheidreeks gratis op eTV gekyk kan word.
LEES OOK: Die Kontrak binnekort terug op ’n nuwe TV-kanaal
Die doel van Die Kontrak is om aspirant kunstenaars in die Afrikaanse musiekindustrie te ontwikkel en vir hulle die platform te skep om ’n superster te word. “Met die dat Die Kontrak nou ook op eTV uitgesaai gaan word kan enige iemand met ’n televisie hierdie pad saam met ons stap,” meen Barry Pretorius, een van die kenners op dié program en bekroonde regisseur van Afrikaans is Groot.
LEES OOK: Die Kontrak 2: Ontmoet die aanbieders
Soos met die eerste reeks, wat in 2018 uitgesaai is, sal drie gesoute kenners week na week die deelnemers beoordeel in die uitklopkonserte. Hulle dien ook as die klankbord vir die “groot baas”, Arnold Coleske, wat aan die einde van elke episode een van die deelnemers se kontrak gaan opskeur.
Corlea Botha deel weer haar talent, ervaring en kennis met die deelnemers. “Om nuwe talent te ontgin en te laat groei is een van die belangrikste dinge wat ’n kunstenaars kan doen. Ons kweek vandag, môre se legendes. Ek sien só uit om deel te vorm van die tweede reeks se reis,” het Corlea gesê.
Barry Pretorius is die tweede kenner – hy het al verskeie groot produksies die lig laat sien en verskeie kunstenaars sukses help bereik. Vandag is hy ook die vervaardiger en regisseur van onder meer Lexus Classics en Afrikaans is Groot.
Die sanger en liedjieskrywer, Theuns Jordaan, is ook terug. Hierdie multi-platinum verkoper en superster van Afrikaanse musiek het meer toekennings en erkennings wat plaaslik uitgelig kan word.
Inskrywings vir Die Kontrak 2020 open op 1 Mei en ook hier wag ’n paar hase in die hoed wat binnekort op Die Kontrak se sosiale media bekend gemaak sal word.
Die wenner van Die Kontrak stap weg as ’n kunstenaar van die gesogte platemaatskappy, Coleske Artists, wat verantwoordelik is vir die loopbane van die land se grootste kunstenaars.
Gesels gerus saam op sosiale media deur gebruik te maak van die hutsmerk #DieKontrak2 of #WenDieKontrak.