Ná ’n ongelooflike eerste seisoen, duisende inskrywings en ’n wenner wat die musiekindustrie gestormloop het, is Die Kontrak, na talle versoeke van die publiek, uiteindelik terug en dié keer sal dit deur almal op die gratis televisisiekanaal, eTV, geniet kan word.
BLY OP HOOGTE VAN DIE KONTRAK HIER
“Ons wil graag hê dat almal Die Kontrak moet kan volg en deel wees van al die aksie tydens dié realiteitsangkompetisie,” het Barry Pretorius, een van die kenners van dié program en bekroonde regisseur van Afrikaans is Groot, vertel. “Na deeglike oorweging het ons as Coleske Artists dus besef eTV sal die perfekte medium wees om die nuwe seisoen van Die Kontrak uit te saai,” het hy verduidelik.
Inskrywings vir Die Kontrak 2020 open reeds op 1 Mei en ook hier wag ’n paar hase in die hoed wat binnekort op Die Kontrak se sosiale media bekend gemaak sal word.
Die wenner van Die Kontrak stap weg as ’n kunstenaar van die gesogte platemaatskappy, Coleske Artists Management, wat verantwoordelik is vir die loopbane van die land se grootste kunstenaars.
Demi Lee Moore, wenner van die eerste reeks in 2018, het die musiekbedryf met haar talent en stem betower en winkels kon nie voorbly met voorraad van haar eerste album, Mis Eet Slaap Herhaal nie. Dié album het binne tien dae na vrystelling goue status behaal nadat sy by die gewilde Afrikaans is Groot-konserte as wenner van Die Kontrak aangekondig is. Haar tweede album, Country, het onlangs die rakke getref en ook dié spog reeds met goue status.
“Die Kontrak het vir my soveel deure oopgemaak en dit is alles te danke aan die geloof wat Arnold Coleske en sy ongelooflike span in my gehad het. Elke kunstenaar met ’n groot droom, wat bereid is om hard te werk, moet vir hierdie kompetisie inskryf,” het Demi Lee gesê.
Soos met die eerste reeks sal daar weer vier mentors wees wat hul eie deelnemers vanuit die hoopvolle inskrywings kies. Die mentors sal elkeen metses deelnemers afskop waarvan slegs twee deelnemers deel van die top 8-groep sal vorm. Elkeen van die top 8-finaliste skop dan hul reis met ’n kontak van Coleske Artists af, maar met elke program wat volg word een deelnemer se kontrak deur die grootbaas, Arnold Coleske, opgeskeur.
Kykers kan solank uitsien na die nuwe mentors wat in April 2020 aangekondig sal word.
“Die doel van Die Kontrak is om aspirant kunstenaars in die Afrikaanse musiekindustrie te ontwikkel en vir hulle die platform te skep om ’n superster te word. Met dié wat Die Kontrak ook nou op eTV uitgesaai gaan word kan enige iemand met ’n televisie hierdie pad saam met ons stap,” het Barry Pretorius verder vertel.
Die tweede seisoen van Die Kontrak se eerste episode word op Saterdag, 29 Augustus 2020 op eTV uitgesaai met ’n herhaling op eEkstra wat sal volg. Die wenner van die tweede seisoen vanDie Kontrak sal weer tydens die Afrikaans is Groot-konsertreeks, wat tussen 20 tot 29 November 2020 in Pretoria plaasvind, aangekondig word. Kaartjieverkope vir dié konserte open op Dinsdag, 28 April om 09:00 by Computicket en die publiek word gewaarsku teen derde partye wat kaartjies te koop aanbied.
Kyk hier na ’n voorskou: