Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!

Classics kom weer in Junie

Die skouspelagtige Classics is Junie terug in Pretoria en musiek word gevier – alles van Bon Jovi tot Andrew Lloyd Webber, van Cyndi Lauper tot Evanescence. Verlede jaar is die gehoor na ’n ander wêreld geneem; vanjaar beloof om gehore sommer na ’n ander hemelruim te neem.

Musiek van Queen, Ed Sheeran, Sir Elton John en ABBA is maar net van die items wat op jou wag. Opgevoer met ’n vol simfonie-orkes en natuurlik Suid-Afrika se beste stemme.

Classics 2018 gaan ’n heel nuwe betekenis aan die term extravaganza gee. Ons bring hulde aan van die grootste musiek-ikone en doen selfs uitreksels uit die legendariese The Lion King en die trefferfilm The Greatest Showman wat tans op almal se lippe is,” vertel Barry Pretorius, kreatiewe regisseur van Classics.

Nóg goeie nuus is dat die geliefde engelkind Amira en die fantastiese Touch of Class weer die verhoog sal deel met ons geliefde en talentvolle Corlea en Jannie Moolman vir vele hoendervleis-oomblikke wat laat glimlag, die trane laat loop en harte warm maak.

Ook op die verhoog is die Amerikaanse sanger Joseph Clark, bekend vir sy uitmuntende vertolkings van Freddie Mercury (Queen at the Opera), die gewilde Tarryn Lamb (van die sanggroep Blackbyrd), asook die beeldskone Monique Steyn.

Volgens Pretorius is daar vele hoogtepunte wat op gehore wag. “Daar is items in die produksie wat gaan sorg dat gehore se asems behoorlik weg geslaan word. Vanjaar se Classics is ’n produksie op wêreldstandaard en die nuwe Sun Arena met sy fasiliteite dra hiertoe by,” sê hy.

Kyk hier na ’n voorskou:

 
Die konsert lok vir die afgelope twee jaar musiekliefhebbers vanuit alle hoeke van die land en is selfs gewild in die buiteland met meer as 17 miljoen trefslae op YouTube van Amira en Patrizio Buanne se weergawe van O Sole Mio asook briewe vanuit die Verenigde Koningkryk, VSA en Kanada wat die konsert met lof besing.

So lyk die vloerplan:

Classics word op 9 Junie 2018 om 13:00 en 19:30 in die Sun Arena van Time Square in Pretoria aangebied. Kaartjies is nóú beskikbaar by Computicket en Shoprite/Checkers-winkels.