Logan Pietersen het onlangs sy nuwe enkelsnit, “Nie Nou Nie,” uitgereik – ’n lied wat die luisteraar intrek in die delikate balans tussen hart en verstand in verhoudings. Hierdie lied vertel van die emosionele oorlogsvelde wat liefde dikwels bring, geïnspireer deur Pietersen se eie ervarings van gee en ontvang in ongebalanseerde verhoudings.
“In verhoudings waar een persoon alles gee en die ander kant minder toegewyd is, voel dit soos ’n stryd tussen jou hart en verstand,” verduidelik Pietersen. “Ek wou hierdie interne konflik in musiek omskep.”
Die snit is vervaardig deur Tertius Human by CoolerBox Studio’s, en die eindresultaat is ’n melodie wat met rou emosie en pragtige akkoordstrukture resoneer.
Pietersen se lirieke raak diep:
“Daar was ’n pad op ’n tyd wat ek gestap het in my lewe, Hoe ek daar beland het weet ek nie, maar daar was ’n rede. Nou’s dit sewe maande later, en die duiwel draai hier rond, Ek sukkel om als te verstaan, wat het ek eintlik nog hier oor?”
Hierdie woorde weerspieël universele gevoelens van onsekerheid en selfondersoek. Hy vertel hoe verleiding en ontrouheid net ’n klein oomblik nodig het om iets kosbaars te vernietig. “Ons moet bewus wees van die emosies waarmee ons ander belas,” voeg hy by.
LEES OOK: Logan Pietersen se nuwe liedjie ‘’n boodskap van liefde en waardering’
Vir die visuele interpretasie van die lied, werk Pietersen met subtiele simboliek om versoeking en selfrefleksie uit te beeld. Hy belowe dat die video sy aanhangers sal betrek en die emosies van die lied verder sal versterk.
Pietersen voeg humoristies by: “Moet asseblief nie die titel ‘Nie Nou Nie’ gebruik as ’n verskoning wanneer julle iets rondom die huis gevra word nie!”
Kyk die musiekvideo hier:
Help Logan herstel ná diefstal
Terwyl Logan hierdie nuwe werk aanbied, staar hy ook ’n groot persoonlike uitdaging in die gesig. Sy klanktoerusting is onlangs uit sy bakkie gesteel – ’n verlies van ongeveer R60 000. Sonder versekering moes Pietersen hom tot ’n Back a Buddy-skarebefondsing wend.
“Ons was gou winkels toe, en toe ek die motorhuis oopmaak, hoor ek daardie skrikwekkende stilte,” vertel hy.
Aanhangers wat hom wil ondersteun, kan dit doen deur ’n bydrae te maak. Elektroniese oorbetalings kan na die volgende bankbesonderhede gemaak word:
- Bank: TymeBank
- Rekeningnommer: 510 691 34789
Met sy eerlike lirieke en passievolle vertoning, bly Logan Pietersen ’n inspirasie – selfs in die aangesig van uitdagings. “Nie Nou Nie” is meer as net ’n lied; dit is ’n oproep tot refleksie en begrip vir die liefde se broosheid.