Die Suid-Afrikaanse alternatiewe rockgroep, Van Der Aven, se nuutste enkelsnit, Die Antwoord Is Jy, is onlangs op alle digitale platforms vrygestel. Dié snit is ook besig om op radiostasies regoor die land te roteer. Die enkelsnit vorm deel van hul tweede kortspeler, bekend as Deel Twee, en is die laaste enkelsnit wat die groep vrystel van musiek wat hulle reeds met hul lewendige vertonings optree.
Die Antwoord Is Jy is ’n alternatiewe rock enkelsnit wat diep inspirasie put uit die klassieke rock ballades van die 90’s. “As ’n 90’s baba het ek grootgeword met ongelooflike rock ballades soos onder andere Goo Goo Dolls se Iris en The Verve se Bitter Sweet Symphony,” vertel hoofsanger en skrywer Roelof van der Merwe. “Die kombinasie van rock dromme en kitaar klanke met simfoniese orkes klanke is nog altyd iets wat ek oor mal is. Ons wou graag hierdie kombinasie probeer met Die Antwoord Is Jy aangesien ons gedink het dat hierdie klanke goed sal werk vir ’n liefdes ballade.”
Die enkelsnit is vervaardig en opgeneem in samewerking met die bekende musiekregisseur Theo Crous by Bellville Studios. “Omdat ons graag meer van ’n rock aanslag en klank met die enkelsnit wou kry, het ons dadelik gedink om weer met Theo te werk,” vertel Roelof. “Dit is ’n groot eer om saam met Theo te kan werk! Hy het soveel ondervinding in die musiekindustrie en is ’n lewende legende.”
Met hierdie snit beoog Van Der Aven om nie net hul lojale aanhangers te bekoor nie, maar ook nuwe gehore aan te spreek wat lief is vir die magiese klanke van rock ballades. Die Antwoord Is Jy beloof om ’n treffende toevoeging tot hul repertoire te wees en ’n nuwe hoogtepunt vir die groep se musikale reis.
Leer ken die manne van Van Der Aven beter hier: