UNIVERSAL MUSIEK (2019)
André Schwartz se 15de solo-album, Die Pad, waarop moderne klanke met elemente van sy vorige werk gekombineer word, bied ’n vreugdevolle en nostalgiese reis deur hierdie geliefde superster se lewe en loopbaan.
André Schwartz se 15de solo-album, Die Pad, waarop moderne klanke met elemente van sy vorige werk gekombineer word, bied ’n vreugdevolle en nostalgiese reis deur hierdie geliefde superster se lewe en loopbaan. Dit volg op 14 solo-albums, waarvan byna almal goue status bereik het, asook sy hoofrolvertolkings in verskeie musiekblyspele soos The Phantom of the Opera en Pirates of Penzance, waarvoor hy bekendheid verwerf het. Dié bekroonde sanger, musikant, teaterster, liedjieskrywer, verhoogkunstenaar, akteur en televisie-aanbieder, wat in 2019 ’n Ghoema-toekenning vir sy lewenslange bydrae tot Suid-Afrikaanse musiek ontvang het, is ook ’n besigheidsman van formaat en trotse eienaar van sy eie bemarkingsmaatskappy.
Die uitvoerende vervaardiger van hierdie album was Leo G. Smit, terwyl die onderskeie snitte se produksie en meng deur Christie Schutte, Murray Lubbe, Tertius Jacobs, Stephan van Huyssteen, Joe Foster, Jake Odendaal, Paul McIver en Ziggy behartig is. Dit bestaan uit 10 oorspronklike snitte deur Joe Foster, Roux Cloete, Stephan van Huyssteen, Christa Steyn, Herman Kleynhans, Hanmarie de Wet, Danelle de Vries en Magiel Andries Roets, asook 4 verwerkings van bestaande gunstelinge wat as bonussnitte ingesluit is.
Die titelsnit, Die Pad, vertel hoe hoop en geloof mense dra langs hul lewenspaaie, vol kronkels en draaie, wat ook baie simbolies is van hierdie nuwe hoofstuk op André se lewenspad. Die eerste enkelsnit, Tweede Kans, beklemtoon die onskatbare waarde van tweede kanse in die lewe vir albei partye, waardeur André se terugkeer na verhoogoptredes ook vir sy aanhangers gesimboliseer word. Die derde enkelsnit, Ek Sal Wag, handel oor ’n onwrikbare geloof in die liefde, waarvolgens ’n mens oor die geduld moet beskik om te wag vir dit wat werklik reg voel.
I Dare To Dream, André se inspirerende duet saam met die internasionaal erkende Suid-Afrikaanse sangeres, Yvonne Chaka Chaka, sorg vir ’n ongeëwenaarde vokale kragtoer. Negentien September, die temalied vir wyle P.G. du Plessis se gelyknamige rolprent, wat deur wyle Christa Steyn gekomponeer is, beloof om luisteraars na hulle sneesdoekies te laat gryp. Ander potensiële treffers sluit in Trap In My Spore, Perfek vir My en Ek Kom Huistoe.
’n Moderne verwerking van sy treffer, Lief Vir Alles Hier, vanaf sy gelyknamige debuutalbum in 1991, asook ’n medley van Ek Wil Jou Nooit Weer Sien en Met Jou In My Lewe, voltooi die sirkel van André se musiekloopbaan. Dié album word met sy indrukwekkende weergawes van Lionel Ritchie se treffer, Hello, en Billy Joel se treffer, Piano Man, op ’n hoogtepunt afgesluit.
Met hierdie album slaag André nie slegs daarin om die volwasse kontemporêre genre ten volle te bemeester nie, maar ook om opnuut te bewys waarom sy musiek ná soveel dekades steeds relevant is. Sy samewerking met ’n jonger generasie en sy bereidwilligheid om by hulle te leer, verseker dat sy uitsonderlike talent, kreatiwiteit en veelsydigheid, asook fenomenale opera-stem aan ’n groter gehoor ten toongestel kan word. Die Pad met sy universele temas, kragtige vertolkings, beeldskone melodieë en positiewe lirieke sal beslis aanklank vind by enigeen wat al verskeie kere langs sy/haar lewenspad geval het en weer moes opstaan.