Sunel: Symptome

Onhafhanklik (2019)

Sunel van der Linde se onafhanklike debuutalbum, Symptome wat sy onlangs uitgereik het, beloof om die simptome van liefde, seerkry, geluk, verliefwees en die lewe self te ondersoek. Hierdie talentvolle blondekop musikant se album, wat uit ’n mengelmoes van musiekgenres bestaan, is deur alledaagse gebeure geïnspireer. Dit volg op verskeie geleenthede die afgelope vyf jaar waartydens sy die verhoog met groot name in die plaaslike musiekbedryf soos Chris Chameleon, Laurika Rauch, Corlea Botha, Coenie de Villiërs, Steve Hofmeyr, Elvis Blue, Pieter Koen, Willem Botha, Bobby en Karlien van Jaarsveld gedeel het.

Die moderne album omslag, waar Sunel in gedagte op ’n winkeltrollie sit terwyl sy die verte instaar, dien as ’n voorsmakie van die emosionele nabetragting wat luisteraars op haar album kan verwag. Die titel, Symptome, haar eie nuutskepping, bestaande uit ’n vermenging van die woorde “simptome” en “symptoms”, verseker dat haar album vir Afrikaanse sowel as Engelse gehore ewe toeganklik sal wees. Hugo Ludik en Vaughan Gardiner van Muse Productions wat dié album se vervaardiging behartig het, was saam met Darryl de Lange ook betrokke by die toonsetting van die tien oorspronklike snitte uit Sunel se eie pen.

Die eerste enkelsnit, Hart Op Jou Mou, wat hierdie album voorafgegaan het, is ’n openhartige liefdesverklaring met ’n eenvoudige produksie, waarby elke romantiese siel aanklank sal vind. Die tweede enkelsnit vanaf dié album, Hart Se Wens, is ’n sielvolle liefdesballade wat vertel hoe ‘n mens dikwels geneig is om teen jou beterwete terug te verlang na ’n gewese verhouding en gevolglik sukkel om aan te beweeg. Die derde enkelsnit, Die Waarheid Maak Seer, wat oor emosionele uitbuiting in verhoudings handel, word weergegee as ’n positiewe bemoediging dat die betrokke persoon ná die seerkry sterker aan die ander kant sal uitkom.

Die treffende debuut-enkelsnit, Fickle Heart, waarvoor sy oorspronklik bekendheid verwerf het, handel oor iemand wat herhaaldelik bly terugkeer na daardie persoon wat voortdurend met sy/haar kop smokkel en met sy/haar hart speel. Die uiters persoonlike snit, Airplanes, bied ’n outobiografiese blik op die lewe en opofferinge wat dikwels van ’n kunstenaar vereis word om sy/haar drome te kan nastreef. Ander potensiële treffers sluit in Myself In Jou Gevind, Soos ’n Dwelm, Games en Never Trust A Man. Dié album word op ’n hoogtepunt afgesluit deur Sunel se treffende weergawe van Sonja Herholdt se legendariese treffer, Ek Verlang Na Jou, wat destyds deur Jan de Wet en FC Hamman spesiaal vir haar geskryf is.

Hierdie eerlike album, wat uit treffende lirieke en hoendervleismooi musiek bestaan, dien as die perfekte vertoonvenster vir hierdie Jazz-prinses om haar strelende fluweelstem asook bedrewe liedjieskryfvaardighede aan haar nuutgevonde luisteraars ten toon te stel. Hoewel Sunel se sterk Jazz en Swing aanslag in sommige opsigte aan Dean Martin, Ella Fitzgerald, Frank Sinatra en Katie Melua herinner, verteenwoordig haar album egter ’n oorkruising van genres wat binne geen boksie pas nie. Symptome met sy introspektiewe lirieke en tydlose melodieë sal beslis aanklank vind by enigeen wat al ooit die positiewe sowel as negatiewe emosies van liefdesverhoudings eerstehands ervaar het.

Leoné Prinsloo

Leoné het haar BA graad in Kommunikasiestudies asook Honneursgraad in Dokumentêre Videoproduksie beide Cum Laude aan die Noordwes Universiteit se Potchefstroomkampus behaal. Verder het sy ook ’n aanlynkursus in Sosiale Mediabestuur deur Get Smarter in samewerking met die Universiteit van Kaapstad voltooi.