Inhoud Huis Musiek (2019)
[yasr_overall_rating]
Die gerekende musiekvervaardiger en merkwaardige kitaarspeler, Danny Smoke, beloof met sy lang verwagte debuutalbum, Swaeltjies, om luisteraars opnuut met ander oë na die liefde en verhoudings te laat kyk. Die musikale styl van hierdie album kan hoofsaaklik beskryf word as ritmiese pop, vermeng met rock en skreeuende kitare, waaruit Danny se voorliefde vir dié instrument baie duidelik blyk. Hierdie uiters begaafde musikant het oor die afgelope vyftien jaar nie slegs verskeie bekende plaaslike kunstenaars se albums vervaardig nie, maar ook konserte soos Afrikaans is Groot en In Afrikaans se verhoë behoorlik aan die brand gespeel.
Die moderne album omslag ontwerp deur Jacques du Preez, waarop Danny in ’n leerbaadjie pryk, maak hoofsaaklik gebruik van swart, wit en grys in verskeie skakerings om sodoende ’n sensuele kontras tussen lig en donker te kan bewerkstellig. Johan Vorster van Inhoud Huis Musiek en Danny Smoke van Precision Music het as die uitvoerende regisseurs van hierdie album opgetree, terwyl Robin Kielly die finale meng van die meerderheid snitte daarop behartig het. Danny se debuutalbum word egter gekenmerk deur ’n ongelooflike energieke produksie, wat hoofsaaklik deur hom en Raymond Green op kitare gedryf word.
Dié effens gewaagde debuutalbum, wat deur die skoner geslag geïnspireer is, bestaan uit dertien oorspronklike Afrikaanse snitte deur Johan Vorster, asook Christoph Kotzé, beter bekend as “Appel” en sy vrou, Sally-Ann. Hierdie gewilde liedjieskrywers slaag ongetwyfeld deur middel van unieke, erotiese ondertone in hulle lirieke daarin om daardie gevoelens, waaroor mense meestal nooit wil praat nie, eksplisiet te kan verwoord. Hierdie benadering blyk baie duidelik uit hulle tong-in-die-kies lirieke vir potensiële treffers soos Gaan Ons Inlê, T-Shirt, As Jy So Vir My Kyk, Soek Jy Aandag Of Soek Jy My Lyf en Trippe Trappe Trone.
Die titelsnit, Swaeltjies, is ’n tong-in-die-kies voetstamptreffer waarin die skrywer vertel hoe hy verlei word deur ’n vrou met ’n tatoeëermerk van swaeltjies agter op haar lae rug wat tot in haar denimbroek verdwyn. Die eerste enkelsnit vanaf dié album, Jou Lippe, handel oor ’n man wat dink dat hy reeds alles in die lewe gesien, geproe en beleef het totdat ’n spesifieke vrou se lippe hom egter bo verwagting kom verras.
Die uiters persoonlike ballade, My Weer Skoon Was, is ’n aangrypende ode waarin Danny sy verlange na sy dogtertjie, wat nie by hom bly nie, uitspreek en haar om vergifnis smeek. Hierdie album word op ’n hoogtepunt afgesluit deur Onder My Vel, Danny se duet saam met Marzanne de Beer, wat in 2012 saam met die voormalige twee Lieflinge, Corlea Botha en Zita Pretorius, die meisiegroep, De La Crème, gevorm het.
Dié album, wat ’n goeie balans tussen betekenisvolle ballades en opgewekte kuiermusiek verteenwoordig, bied ’n vars benadering tot popmusiek. Hoewel hierdie album oor ’n goeie kombinasie van verskeie kommersiële elemente beskik, word sy musikaliteit en kreatiwiteit op geen stadium ingeboet ter wille daarvan nie. Swaeltjies met sy kitaargedrewe produksie, eerlike vertolking, erotiese lirieke en sterk melodieë sal beslis aanklank vind by enigeen, wat al ooit halsoorkop verlief of in ’n bevredigende liefdesverhouding betrokke was.