Chereé: Wilde Waters

Universal Musiek (2019)

Suid-Afrika se goue country-ster, Chereé, keer na byna tien jaar terug met haar lang verwagte album, Wilde Waters, wat beloof om luisteraars se harte opnuut te raak. Dit volg op die sukses van haar self-getitelde debuutalbum, wat sy op 19-jarige ouderdom reeds uitgereik het, asook haar ander albums, Smile, Mamma, Country Girl en In My Drome. Hierdie dinamiese sangeres het oor die afgelope drie dekades die voorreg gehad om die verhoog met verskeie groot name soos Cariké Keuzenkamp, Toni Wille en Albert Hammond te kon deel. 

Die sensuele, dog klassieke album omslag, maak van pastelkleure soos pienk en ligblou teen ’n donker agtergrond gebruik om sodoende ’n sterk kontras tussen die ernstige en tong-in-die-kies snitte aan te dui. Hierdie album, wat ’n goeie balans tussen oorspronklike Afrikaanse en Engelse musiek bied, is deur Hugo Ludik en Vaughan Gardiner van Muse Productions, asook Andrew Roos van Brak Musiek vervaardig. Die moderne country-pop klank word bewerkstellig deur Vaughan Gardiner op klavier, Andrew Roos op klawerbord, Raymond Green en Johan Rautenbach op kitaar, Hugo Ludik en Andrew Roos op baskitaar, Bruce Wallace en Vinnie Henrico op dromme, asook Juan Oosthuizen op dobro en Lizanne Dippenaar op viool. 

Buiten Chereé, wat self een Afrikaanse en drie Engelse snitte neergepen het, spog dié album met verskeie gesogte liedjieskrywers, soos Vaughan en Nerine Gardiner, asook Hugo Ludik, Rudi Claase, Roux Cloete, Tony Ridgway, Michael Lindt en Wouter van de Venter. F.J. Glober en P.J. Blomerus verdien egter spesiale vermelding vir Gypsies van die Kaap, hulle roerende huldeblyk aan Chereé se geliefde Kaap, waarvan hulle onderskeidelik die lirieke geskryf en die melodie gekomponeer het. 

Die titelsnit, Wilde Waters, wat ’n terugblik bied op die mooi herinneringe tussen twee mense met die hoop dat dinge sal uitwerk, handel oor hulle daaglikse worsteling om geluk binne hul verhouding te kan vind. Die eerste enkelsnit vanaf dié album, Praat, wat deur ’n persoonlike gebeurtenis geïnspireer is, herinner luisteraars aan die belangrikheid van kommunikasie met mekaar op ’n emosionele vlak binne enige verhouding. 

Chereé se aanhangers word bederf met Hierdie Hart van My, ’n duet saam met haar man, Wynand Strydom, wat volg op dié gewilde country-paar se suksesvolle duet-albums, Dit Is Ons Lewe en So Onthou Ons Ons Gunsteling Duette. Ander potensiële treffers sluit in Hierdie Is My Huis, Uit Die Blou, Jy is Vrou, Les In Die Liefde, Live And Let Live en Little White Lies. Hierdie album word egter op ’n hoogtepunt afgesluit met haar smeulende weergawe van die Amerikaanse country musiekgroep, Little Big Town, se treffer, Girl Crush

Chereé se nuutgevonde volwassewording van vrouwees en moederskap in haar persoonlike lewe is ook opmerklik in die uiteenlopende verskeidenheid snitte wat op dié album gehoor kan word. Alhoewel dit hoofsaaklik deur ’n country-aanslag gekenmerk word, bevat dit ook meer kommersiële popsnitte om sodoende iets vir elke oor en smaak te kan verseker. Wilde Waters, met sy romantiese en sensitiewe kwaliteite, dien as onteenseglike bewys van die ongelooflike groei wat dié veelsydige kunstenaar oor die afgelope dertig jaar getoon het.

Leoné Prinsloo

Leoné het haar BA graad in Kommunikasiestudies asook Honneursgraad in Dokumentêre Videoproduksie beide Cum Laude aan die Noordwes Universiteit se Potchefstroomkampus behaal. Verder het sy ook ’n aanlynkursus in Sosiale Mediabestuur deur Get Smarter in samewerking met die Universiteit van Kaapstad voltooi.