JNDR Musiek (2019)
[yasr_overall_rating]
Liani Reynolds se debuutalbum, Ligsoom, beloof om nie slegs vir haar ’n permanente plek in die harte van Suid-Afrikaanse musiekliefhebbers te verseker nie, maar ook ’n versamelstuk te word, waarin luisteraars aspekte van hulleself stuk-stuk langs hulle lewenspad sal ontdek. Die absolute eenvoud en vreugde, waardeur haar grootwordjare op hulle familieplaas naby Piet Plessis in Noordwes gekenmerk is, het as perfekte teelaarde gedien vir haar ryke verbeelding soos uit verskeie persoonlike belewenisse op dié album blyk. Hierdie veelsydige kunstenaar was verder ook saam met Joshua Na Die Reën, Len Muller, Leon Gropp, Lizandra Winter en Kaleidoskoop deel van Musiek Soos Grond, ’n onafhanklike groep kunstenaars, wat vroeër vanjaar akoestiese konserte regoor Suid-Afrika aangebied het.
Dié album bestaan uit elf oorspronklike Afrikaanse snitte, waarvan agt uit Liani se pen kom, terwyl Jacques de Villiërs en Jaco van der Merwe ook elkeen onderskeidelik hulle duette saam met haar geskryf het. Jacques, beter bekend as Joshua Na Die Reën, was vir die verwerkings en vervaardiging verantwoordelik, terwyl Jason Ferreira die klankopnames, Ewald Jansen van Rensburg die klankvermening en Rogan Kelsey die bemeestering behartig het. Die luisterryke nostalgie word bewerkstellig deur Jacques en Liani op klavier, Coenrad Rall op trekklavier, Carel Henn op tjello, Andy Maritz op dromme, en Nathan Smith op kitaar, asook Gerhard Bienedell en Rixi Roman op baskitaar, sowel as Evert van Niekerk, Jacques Fourie en Lize Schaap op viool.
Ligsoom, die titel as ’n samevattende konsep van die tema waaroor hierdie album handel, verwys na die mens se idee van hoe iets moet lyk as dit goed en vry is. Die kunstige album omslag ontwerp deur Daneille Joubert van Yesterfang vertoon ’n skildery van Liani met ’n mossie in haar linkerhand en ’n stok in haar regterhand waaraan die maan in ’n net oor haar skouer hang met die sterrehemel teen die agtergrond. Die binnekant van die omslag bevat ’n visuele voorstelling van ’n swaeltjie binne die ligsoom, waarvan slegs die buitelyne in die vorm van roomkleurige sterretjies op ’n bruin agtergrond uitgebeeld word.
Volgens die skrywer woon daar mossies binne-in hierdie ligsoom, wat in die hede van die realiteit versteek is, maar hulle sweef onsienlik sonder om al die aandag vir hulself toe te eien sodat ander ook in die lig kan wees. Vandaar dan ook die eerste enkelsnit vanaf hierdie album, Mossie, wat sy opgedra het aan haar ouma, Cecilia Johanna Botha, en haar vierde kind, Naomi Botha, beter bekend as “Mossie”, wat gestremd was as gevolg van komplikasies tydens haar geboorte. Hiernaas bestaan dié album ook uit verskeie ander odes aan haar geliefdes, insluitend Skuiling vir haar pa, Ruimte vir haar skoonpa, Louis Percy George, Herontmoeting vir haar mentor, Tom Gouws, en Groen vir haar man, Kalla.
Vlieërs, haar duet saam met Jacques, handel oor die naatlose ruimte en totale aanvaarding tussen goeie vriende, waar hulle die vryheid het om, soos vlieërs, te gaan waar die wind hulle waai, maar nog steeds in veilige hande gegrond is. Gewoond, haar duet saam met Jaco van Bittereinder faam, is ’n treffende snit waardeur ’n bepalende oomblik in haar lewensreis met behulp van kletsrym effektief aan luisteraars oorgedra word. Hierdie album bevat heel gepas die konsertweergawe van Amanda Strydom se tydlose treffer, Pelgrimsgebed, wat dien as die ideale vertoonvenster vir Liani se kleurvolle altstem. Ander potensiële treffers sluit in Swaeltjie, Sterredigter en So Baie Dinge.
Hierdie unieke kontemporêre album, waarmee Liani debuteer, neem luisteraars deur middel van sy opregte boodskap, nostalgiese styl en eksperimentele klank op ’n baie persoonlike reis deur haar lewe tot dusver. Met Liani se indrukwekkende stem, meesleurende melodieë, diep deurdagte storievertellerslirieke en hartroerende opregtheid, slaag sy ongetwyfeld daarin om nie slegs ’n prentje in die kop van ’n luisteraar te skilder nie, maar hom of haar ook daarheen weg te voer. Indien jou verbeelding, nes dié van hierdie talentvolle skrywer, deur stories oor gewone, dog uitsonderlike mense geprikkel word, is Ligsoom ’n moet vir jou versameling!