Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!

Louis Geldenhuys: Harte in die lug

Louis Geldenhuys (2019)

Louis Geldenhuys se onafhanklike debuutalbum, Harte in die lug, wat onlangs uitgereik is, beloof om nuwe lewe in die Suid-Afrikaanse country-pop genre te blaas. Dit volg op verskeie optredes by feeste soos die KKNK en kykNET Buite Ekspo gedurende 2018 waar sy musiek telkemale baie goed deur die publiek ontvang is. Hierdie talentvolle musikant het ook reeds in Mosselbaai die geleentheid gehad om die verhoog met Manie Jackson, Rudi Claase, Pieter Koen, Nádine en Monique Steyn te kon deel. 

Die informele album omslag ontwerp, wat deur ’n stylvolle kombinasie van koue kleure soos turkoois en wit asook warm kleure soos oranje en ligbruin gekenmerk word, skep ’n speelse atmosfeer vir die melodieuse musiek wat luisteraars daarop te wagte kan wees. Hierdie album spog met verskeie bekende musikante soos Werner Beukes, Dennis East en Mike Pilot, waarvan die eersgenoemde twee ook die musiek se programmering behartig het. 

Dit bestaan uit tien oorspronklike Afrikaanse snitte en een vertaalde snit wat wissel tussen opgewekte dansmusiek en dieper liefdesballades asook gospelliedjies. Elke snit is spesiaal deur bekende liedjieskrywers soos Dennis East, Warren Grey Elliot, Rudi Claase en Pierre Rossouw geskryf om aan Louis se liefde vir sy gesin asook sy verlange na die verhoog en musiekbedryf reg te kan laat geskied. 

Harte in die lug, die titelsnit sowel as debuut-enkelsnit, vergelyk twee verliefdes met ballonne wat deur die wind aangedryf word tot waar hulle ’n paradys ontdek en hul liefde oorheers ten spyte van die winde wat hulle van hul drome probeer weerhou. Engel, die tweede enkelsnit vanaf hierdie album, handel oor ’n stormagtige verhouding wat gered word deur die skrywer se besluit om sy geliefde die voordeel van die twyfel te gee, selfs al voel hy nie noodwendig dat sy dit verdien nie. Vlamme handel oor die langafstandverhouding tussen ’n man en vrou deur hulle verlange na mekaar te vergelyk met ’n brandende vuur waarvan die vlamme hulle wedersydse liefde stoor totdat hul mekaar uiteindelik weer kan sien. 

Met die aangrypende snit, Sy is ’n vrou wat kan, gee Louis welverdiende erkenning aan sy vrou, Lindi wat in sy oë tot enigiets in staat is, vir haar enorme aandeel in sy lewe. Ander potensiële treffers sluit in Jy is my Lewe, My beloftes, Eenkeer en Gee my die kans. Dié album word heel gepas afgesluit deur ’n gospelliedjie vanuit Rudi Claase se pen, Laaste Liedjie, wat Louis opdra aan Sy Hemelse Vader waarsonder niks moontlik sou wees nie. 

Dié album slaag nie slegs daarin om Louis se gesofistikeerde stem en styl ten toon te stel nie, maar ook om ’n splinternuwe, opwindende hoofstuk in sy musiekloopbaan in te lui. Alhoewel dit grotendeels aan die lekkerluister-country-pop aanslag van kunstenaars soos Bles Bridges, BZN, Jim Reeves en Albert Hummond herinner, slaag dit egter nog steeds daarin om ’n verfrissende dimensie aan dié geliefde genre te kan verleen. Harte in die lug met sy opgewekte, meesleurende lekkerluisterwysies en vrolike liefdeslirieke sal beslis aanklank vind by enigeen wat al ooit liefde, hartseer en vergifnis eerstehands ervaar het. 

Leoné Prinsloo

Leoné het haar BA graad in Kommunikasiestudies asook Honneursgraad in Dokumentêre Videoproduksie beide Cum Laude aan die Noordwes Universiteit se Potchefstroomkampus behaal. Verder het sy ook ’n aanlynkursus in Sosiale Mediabestuur deur Get Smarter in samewerking met die Universiteit van Kaapstad voltooi.