Burkhart Music (2018)
[yasr_overall_rating]
Burgerd Botha se lang verwagte debuut solo-album, Hartlagsiel, waarmee dié uitsonderlike musikant ’n opwindende, nuwe hoofstuk van sy loopbaan betree, beloof om luisteraars se asems behoorlik weg te slaan met verskeie klanke en style. Hierdie vrystelling is voorafgegaan deur die enkelsnitte, Hartlagsiel en As Jy Nog Twyfel wat albei bo-aan verskeie televisie- en radiostasies se trefferparades gepryk het. Dié voormalige tenoor van Romanz het saam met die ander drie lede van hierdie multi-platinum bekroonde groep in die koningshuis van Monaco opgetree asook die verhoog met verskeie internasionale sterre soos Katherine Jenkins en Jennifer Rush gedeel.
Die moderne, byderwetse album omslag ontwerp deur Christian Wolf Visuals word deur ’n kunstige vermenging van verskeie blou en grys skakerings gekenmerk. Hierdie onafhanklike album bestaan uit vyftien oorspronklike snitte waarvan Burgerd tien liedjies en Stephan van Huyssteen een liedjie geskryf het terwyl Reinette van Rensburg, Carlé van Deventer, Elben Schutte en Joshua Oosthuizen ook hand bygesit het.
Die titelsnit, Hartlagsiel is ’n nuutskepping vir die skrywer se geliefde wat met behulp van diep, deurdringende lirieke in dié popsnit met sy treffende akoesties-elektroniese aanslag beskryf word. Die kragtige ballade, As Jy Nog Twyfel is ’n aangrypende liefdesverklaring wat dien as ’n vertoonvenster vir Burgerd se vokale suiwerheid. Die Sterre wat deur eerlike lirieke en energieke melodielyne gekenmerk word, beskryf die fase in ’n verhouding waartydens jy wens dat jy die heelal kon laat stilstaan vir daardie persoon op wie jy besig is om verlief te raak.
Vat My Huistoe handel oor ’n persoon wat sy geliefde om verskoning vra nadat hy besef dat sy optrede haar in die spervuur geplaas het en haar daadwerklike versoening beloof om hulle liefde weer te laat blom. Deur Vuur Getemper moedig die luisteraars aan om altyd weer op te staan en nooit toe te laat dat negatiewe ervarings vanuit hulle verlede hul definieër nie, selfs al voel dit soms asof hulle alles in die lewe verloor het. Ander potensiële treffers sluit in Sonder Rame, Sy aan Sy, Suikerbossiesoene en Leef van Genade.
Help Me Love, Drivin’ en One Thing Right dien as ’n bewys dat hierdie veelsydige sanger, liedjieskrywer, komponis en uitvoerende kunstenaar ewe goed in Afrikaans sowel as Engels kan skep. Burgerd se vertolking van Vergeet My Nie saam met die koor, Akustika, sorg vir ’n eiesoortig treffende weergawe van Johan en Rencha Vorster asook Sean Else se lied wat oorspronklik deur Lianie May opgeneem is. Hierdie album word afgesluit deur ’n akoestiese snit in die vorm van ’n gebed, Waarvoor ek vra, wat hy opdra aan sy vriend en mede-oud-Romanz-lid, Adam Barnard, wie se moeder onlangs in ’n tragiese motorongeluk oorlede is.
Die elektroniese- en akoestiese-pop asook pop-rock en volwasse kontemporêre style sowel as die tikkie pop-jazz en swing op hierdie album word bewerkstellig deur ’n verskeidenheid instrumente, insluitende klavier, kitaar, tjello, tenoorsaksofoon, akoestiese kitaar, elektriese kitaar, baskitaar, dromme, EP en UDU. Buiten Burgerd self, is Mathys Maree, Vinnie Henrico, Denny Laloulette, Jacobus Schutte, Elben Schutte, Brendan Ross, Marie-Louise Diedericks, Joshua Oosthuizen en Hencas van Huyssteen die ander musikante wat op sy album gehoor kan word. Die produksie en verwerkings is behartig deur Christiaan Schutte van Startrax Studios, Elben Schutte van Songfarm Productions, Stephantasties van Phantastic Studios, Murray Lubbe van The Hit Factory en Joshua Oosthuizen van Oriison Productions.
Dié uiters persoonlike album wat uit Burgerd se seerkry gebore is, moedig luisteraars aan om die lewe elke dag opnuut aan te pak, ongeag van die feit dat dit soms moeilik is en alles nie altyd volgens plan verloop nie. Dit dien as ’n lewende bewys van hoe al God se beloftes in sy lewe uiteindelik bewaarheid is omdat hy aangehou het om Hom te vertrou sonder om ooit die wenstreep uit die oog te verloor. Hartlagsiel met sy unieke kombinasie van ligte akoestiese popmusiek, hartroerende ballades en interessante elektroniese klanke sal beslis aanklank vind by enigeen wat al ooit ’n traumatiese gebeurtenis in sy/haar lewe oorkom het.