Inhoud Huis Musiek (2019)
[yasr_overall_rating]
Jo Black se tweede album, Voel Jy Die Genade wat binne slegs tien dae vanaf sy vrystelling goue status bereik het, bied ’n unieke mengsel van geloof, hoop en liefde wat luisteraars sal inspireer en bemoedig. Dit volg kort op die ongekende sukses van sy debuutalbum, Skepe wat nie slegs met trippel-platinum-verkoopstatus spog nie, maar ook alle rekords laat spat het deur vir hom ’n allemintige sewe Ghoema-musiektoekennings te besorg. Dié bebaarde superster het verder ook bekendheid verwerf vir sy gasverskyning in die Afrikaanse rolprent, Susters waarvoor hy en Leah saam die aangrypende temalied, Nooit Alleen opgeneem het.
Die album omslag waarop die kenmerkende Jo Black embleem pryk en hy spontaan kitaar speel, dien reeds as vooruitwysing na die buitengewoon eerlike blik op sy persoonlike lewe wat op hierdie album verwag kan word. Die vervaardiging en verwerking van al dertien snitte op dié album is deur Murray Lubbe en Danny Smoke behartig terwyl hulle albei saam met Johan Vorster ook vir die finale meng en meester daarvan verantwoordelik was.
Jo Black het al twaalf oorspronklike liedjies geskryf saam met die talentvolle Johan Vorster wat ook as die uitvoerende vervaardiger van sy album opgetree het. Christoph Kotzé, beter bekend as Appel, en Roan Ash asook Jattie de Beer van Douvoordag-faam het egter ook met die skryf van enkele snitte hand bygesit. Die kenmerkende rock-klank wat op dié album gehoor kan word, is bewerkstellig deur Juan (Floors) Oosthuizen en Danny Smoke op kitaar asook Denny Laloulette en Danny Smoke op baskitaar sowel as Murray Lubbe op klavier en klawerbord.
Die titelsnit, Voel Jy Die Genade vier nie slegs Jo Black se sukses in sy loopbaan gedurende die afgelope twee jaar nie, maar bied ook ’n blik op alles in sy lewe waarvoor hy dankbaar is. Verlore Seun en Ek sal sing is verdere biografiese snitte op hierdie uiters persoonlike album waarin die skrywer se stormagtige verlede sowel as sy blink toekoms onderskeidelik beskryf word. Die aangrypende lied, Jy’t my gewys is vir sy pa geskryf terwyl hy die ballades, Bitter en Huis op die Heuwel aan sy vrou, Debbie Engelbrecht, opgedra het. Ander potensiële treffers sluit in Spring, Die Lig, Hand Op Jou Bors en Wat As. Dié album word heel gepas afgesluit deur sy emosie-belaaide weergawe van Leonard Cohen se tydlose treffer, Hallelujah waardeur die volle omvang van sy vokale vermoëns aan luisteraars ten toon gestel word.
Die sentrale onderliggende tema van God se krag om met Sy onvoorwaardelike genade en vergifnis mense se lewens vir altyd ingrypend te kan verander, loop soos ’n goue draad deur dié opbouende en betekenisvolle vrystelling. Hierdie album wat in byna elke opsig getrou bly aan die klank van sy debuutalbum, dien as die onbetwisbare bewys dat hierdie sukses resep van hom nog lank nie sy trefkrag verloor het nie. Voel Jy Die Genade bestaande uit verskeie rock-treffers in Jo Black se kenmerkende vertel trant sal beslis aanklank vind by enigeen wat al ooit vrese en teleurstellings of mislukkings uit sy/haar verlede moes oorkom.