‘Pure Coenie’ eersdaags ook op US Woordfees

FOTO: Verskaf

Pure Coenie is die konsert van Coenie de Villiers se grensverskuiwende nuwe album, Pure Coenie. Dié nuwe liedere en meegaande oudio-visuele aanbieding het ’n sensasie by die Klein Karoo Nasionale Kunstefees (KKNK) veroorsaak, en daardie einste konsert kom nou na die Woordfees.

“Musiek en liriek is so dig verweef dat dit klink asof dit gesamentlik en organies geskep is. Albei is kuns – eerlike, onopgesmukte musiek en digkuns. (Dis vir my) ongetwyfeld sy mooiste konsert,” skryf die resensent Wim Vorster oor die konsert.

Coenie word op die verhoog bygestaan deur kitaarmaestro Mauritz Lotz, wat ook met De Villiers aan die produksie van die album saamgewerk het. “Die musiek is stiller en kyk meer inwaarts,” meen Coenie. “Dis ’n album waarop ek weer nuut en vars wil skryf – dit het so maklik gelyk op sewentien!”

Daar is ’n uiteenlopende aantal kunstenaars wat op die album saam met De Villiers verskyn: Vicky “My African Dream” Sampson, Francois van Coke, Joshua na die Reën, Brandon October en Leon Gropp is van die sangers wat saamsing, “maar op ’n heel nuwe manier en met ’n nuwe klank”, vertel Coenie. Dan is daar die formidabele klassieke Odeion Strykkwartet wat saamspeel met niemand minder as teater-reus Dr John Kani in ’n snit waarvan Coenie die musiek en vertel-teks geskryf het.

“Ek het al die musiek en liriek vir die album geskryf,” sê Coenie. “Die konsert is egter ’n ‘unplugged’ uitvoering wat mense hopelik plesierig onkant gaan betrap. Die verwerkings is ongewoon: hier en daar is die snitte slegs akoesties – dis baie min waar ’n mens nie ’n enkele masjien op ’n snit sal aantref nie. Ons wou dit weer probeer om te kyk of ons dit nog kan doen. En die konsert is geheel en al baby-vry!” lag hy.

Pure Coenie is die Stellenbosse stadsaal op Saterdag, 2 Maart om 20:00 en Maandag, 4 Maart om 11:00 te sien. Klik hier om kaartjies aanlyn by Computicket te koop.

Die 20ste US Woordfees vind vanaf 1 tot 10 Maart 2019 op Stellebosch plaas. Die volledige feesprogram is beskikbaar by www.woordfees.co.za.