Vanjaar se US Woordfees vind van 2 tot 11 Maart op Stellenbosch plaas en jy kan 100% seker wees van top musiekkonserte. Hier’s vyf hoogtepunte waarna jy kan uitsien:
DROOM, MARTHA, DROOM
Met: Koos van der Merwe
Teks: Koos van der Merwe
Toonsettings: Koos van der Merwe en Matthys Maree
Tegniese versorging: Yolandi van der Wath
Martha wag vergeefs dat haar minnaar sy beloftes nakom. ’n Troebadoer wens Katrien was nie so ’n flerrie nie. Elders sing ’n man van ’n somerrok van fyn katoen, want aan háár lyf doen dit dinge aan hom! Koos van der Merwe se eiesoortige lirieke met Matthys Maree se toonsettings daarvan vier die liefde in talle gedaantes. Klik hier vir meer.
ELVIS BLUE: SAAM
Met: Elvis Blue, Ray Green (kitaar), Jasper Janse van Rensburg (baskitaar) en Thinus Odendaal (perkussie)
Verhoog- en produksiebestuur: Kona Brown
Klank en beligting: Duane Brown
Elvis Blue wou nie net nog ’n show doen waar hy en die musikante op die verhoog is en die gehoor daar onder sit nie. Hy sing en hulle klap hande. Hy wou die gehoor nader hê en so is die konsep van SAAM gebore. Dit is ’n show, maar dis eintlik ’n ruimte, ’n oomblik, waar hy en almal wat naby is, kan deel in die musiek. SAAM kan gaan na die plekke waarheen musiek ’n mens neem. Dit is ’n reis wat jy wil meemaak. Klik hier vir meer.
TWEE – INTIEM
Met: Herman Kleinhans en Maria Rademan
Dié duo gaan die hartsnare met mening streel met al hul ou gunstelinge asook van die splinternuwe liedjies wat op hul tweede album verskyn. Klik hier vir meer.
LOKI ROTHMAN
Loki Rothman was nie nét Jack Parow se kitaarspeler nie. Nie eens ‘Blou’, sy treffer saam met Laurika Rauch, is die einde van sy talente nie. Op sy eie, is hy ’n formidabele eenmanorkes wat die snare soms soos perkussie-instrumente laat klink en die asem wegslaan. Klik hier vir meer.
FOKOFPOLISIEKAR
Kom geniet ’n buiteligkonsert in die pragtige Stellenbosse natuurskoon en kry iets te ete by die kosstalletjies. Bring net iets om op te sit en ’n trui of baadjie om aan te trek. Geen piekniekmandjies word toegelaat nie. Klik hier vir meer.
Die volledige musiekprogram is hier beskikbaar.