Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!

Ivan Roux: Daai Ding

Coleske Artists (2018)

Ivan Roux se debuutalbum, Daai Ding wat onlangs vrygestel is, beloof om alle dansvloere regoor die land op horings te neem. Dié begaafde naaswenner van VIA se gewilde werklikheidsreeks, Die Kontrak wat in 2014 ook een van Idols SA se deelnemers was, het vanjaar sy debuut op die Afrikaans Is Groot verhoog gemaak.

Die album omslag ontwerp deur Francois Olivier maak hoofsaaklik van bruin en khaki kleurige skakerings teen ’n ligte agtergrond gebruik om ’n industriële gevoel aan Ivan se jeugdige voorkoms te verleen. Dié album is deur Paulo Azevedo en Arnold Coleske gemeester wat ook vir alle stemopnames en -redigering daarop verantwoordelik was. Juan (Floors) Oosthuizen en Danny Smoke op kitaar asook Denny Lallouette op baskitaar, Deveroux van der Hoven-Oosthuizen op klavier en agtergrondstemme deur Murray Lubbe sorg vir hierdie album se moderne klank.

Vier van die tien snitte op dié album kom uit die veelbekroonde skrywer, Johan Oberholzer se pen. Die oorblywende ses snitte daarop is verwerkings van verskeie reeds bekende treffers sowel as lewendige opnames soos dit tydens Die Kontrak deur Ivan opgevoer is. Daai Ding, die titelsnit en ook Ivan se eerste enkelsnit skop die album op ’n hoë noot af en die luisteraars sal nie anders kan as om daarop te wil roer nie. My rede is ’n popliedjie wat definitief die potensiaal het om nog ’n groot radiotreffer in die toekoms te word. Die liefde vertel die storie van hoe ’n man sy begrip van liefde in ’n liedjie verwoord terwyl Foutief handel oor iemand wat ’n fout begaan het en dan om vergifnis vra.

Ivan se besondere vertolking van immergroen treffers soos Laurika Rauch se Vier seisoene kind en Kinders van die wind asook Michael Lindt se Is jy nie meer lief vir my sorg vir ’n tikkie nostalgie op dié album met sy groot verskeidenheid. Dis egter die heel nuwe baadjie wat hy vir Karen Zoid se gewilde liedjie, Engel sowel as vir EDEN se groot treffer, 54 5de Straat aantrek wat ’n mens nie aldag hoor nie en waarmee hy homself ook van ander kunstenaars in dieselfde mark onderskei.

Dié album bied ten spyte van sy oorheersende pop aanslag nietemin nog steeds iets van alles vir sy luisteraars. Alhoewel Ivan se stem plek-plek aan die van Bobby van Jaarsveld herinner, slaag hy tog daarin om met sy debuutalbum vir homself ’n regmatige plek binne die Afrikaanse musiekmark te kan verseker. Daai Ding met sy aansteeklike melodieë en lirieke sal beslis aanklank vind by elkeen wat nie anders kan as om voortdurend op die dansbaan te boer nie.