Die wenner van VIA (DStv-kanaal 147) se musiektalentkompetisie Die Kontrak sal amptelik op Vrydag 23 November by die eerste Afrikaans is Groot-megakonsert van 2018 by die Sun Arena, Pretoria aangekondig word. Dié episode word egter eers Woensdag 28 November om 20:00 op die Afrikaanse leefstylkanaal uitgesaai.
Die Kontrak-superaanhangers wat nie tot 28 November wil wag om uit te vind of die Durbanviller Demi Lee Moore (28) of die Pretorianer Ivan Roux (28) ’n platekontrak van een miljoen rand by Coleske Artists losslaan nie, kan die groot wen-oomblik op Netwerk24 se webblad of YouTube-kanaal stroom.
LEES OOK: Die Kontrak: Vyf ooreenkomste tussen Ivan en Demi Lee
Die Netwerk24-span sal die identiteit van Die Kontrak-wenner regstreeks vanaf Afrikaans is Groot bekendmaak. Die opsie om die wen-oomblik op Netwerk24 te stroom sal prominent op dié nuuswebblad se tuisblad vertoon word. Diegene wat verkies om tot 28 November te wag om uit te vind wie die wenner van Die Kontrak is, word aangeraai om vanaf 23 November VIA en Afrikaans is Groot se Instagram-stories vir 24 uur te vermy.
Die Kontrak-toptwee se musiekvideo’s het die afgelope week amptelik gedurende die uitsending van Die Kontrak gepremiere. Die musiekvideo’s vir Demi Lee Moore se Mis eet slaap herhaal en Ivan Roux se Daai ding kan nou eksklusief op die JOOX-app gestroom word. Die toptwee se albums is tans landwyd op die rakke van Musica-winkels beskikbaar.
Nuwe episodes van Die Kontrak word elke Woensdag om 20:00 op VIA uitgesaai met heruitsendings op Vrydae om 19:00, Saterdae om 21:00 en Sondae om 18:00. Die JOOX-app is die amptelike stroomvennoot van Die Kontrak.