FOTO: Verskaf
In die week se aflewering van VIA (DStv-kanaal 147) en Coleske Artists se werklikheidsreeks, Die Kontrak, het ons die 17-jarige leerder van Centurion, Tatum Strydom, gegroet. Hier is haar vyf vrae en antwoorde:
Wat het jou laat besluit om in te skryf vir Die Kontrak?
Ek het ingeskryf omdat ek nie ’n geleentheid wil laat wegglip nie. Elke geleentheid wat ek kry, wil ek aangryp en daai golf ry. Toe dié geleentheid oor my pad gekom het, het ek geweet ek moet dit vat. Ek het absoluut niks om te verloor nie.
Wat is jou grootste hoop vir jou musiekloopbaan?
Ek wil bekend word vir die Here. Ek was een keer in die kerk en die pastoor het in die middel van sy preek gestop en vir my gesê, “Girl, die Here gaan jou baie famous maak vir Hom.” Ek wil soveel mense na Hom toe lei. Ek wil mense se harte inspireer om na die Here toe gelei te word. Dís my doel en ek gaan dit gehoorsaam.
En wat is jou grootste vrees?
Ek vertrou ek is in goeie hande. Byvoorbeeld, Miley Cyrus was ’n soet, onskuldige dogtertjie en hulle het haar hele kommersiële aanslag verander om meer mense te lok. Dít maak my bang. Ek wil nie in só ’n situasie geplaas word waar ek op ’n wrecking ball moet swaai nie. Maar ek is nie bang nie, want my hoop en vertroue is sterk genoeg.
Watter kunstenaars is jou grootste musikale invloede?
Lana del Rey se storie is vir my wonderlik. Pink is ’n wonderlike performer. En natuurlik ook my mentor Tarryn Lamb. Sy is ’n amazing mens en ons kliek so lekker. Wanneer jy met haar praat, sien sy dadelik wie jy is as mens. Ek hou ook baie van Elvis Blue se musiek.
As jy nie ’n musiekkunstenaar was nie, watter ander beroep sou jy nastreef?
Ek het al so baie beroepe oorweeg. Ek wou al ’n henna-kunstenaar wees. Ek wou al ’n haarkapper geword het. Ek hou van arty farty, praktiese werk. Moet my asseblief nie agter ’n lessenaar sit nie! My ander groot liefde is wildbewaring.
Nuwe episodes van Die Kontrak sal elke Woensdag om 20:00 uitgesaai word met heruitsendings op Sondae om 18:00. Die JOOX-app, die Suid-Afrikaanse stroomdiens met die meeste Afrikaanse inhoud, is die amptelike stroomvennoot van Die Kontrak.