Wilha Carstens: Die singende kroegman van die Swartland

FOTO: Verskaf

Die kroegman van Pretoria, Wilha Carstens, is dié week sy kontrak kwyt in VIA (DStv-kanaal 147) en Coleske Artists se werklikheidsreeks, Die Kontrak. Ons het gaan inloer vir ’n vinnige vat vyf:

Wat het jou laat besluit om in te skryf vir Die Kontrak?
Wat in dié program gebeur in ’n maand of twee maande is waarvoor meeste kunstenaars 20 jaar werk. Dit is wonderlik om met die betrokke mense te werk en om deur iemand soos ons Grootbaas raakgesien te word. En dié ondervinding wys jou vinnig of jy dit wil doen of nie. Ek wil uit dié ervaring leer en sien of die bedryf vir my is. Dít is nie iets wat geld kan koop nie. Dít is 20 jaar se ondervinding wat in ’n paar maande vir ons gegee word.

Wat is jou grootste hoop vir jou musiekloopbaan?
Dat ek suksesvol kan wees in my eie styl en nie besluite hoef te maak oor verkope nie. Dat ek die boodskap wat ek as kunstenaar het, uit te leef.

En wat is jou grootste vrees?
Dat mense my kuns as vervelig sal sien en – veral in die Afrikaanse mark – dat mense my musiek as kermerig sal sien, aangesien ek nie dansmusiek skep nie.

Watter kunstenaars is jou grootste musikale invloede?
Sam Smith, Beyoncé en Callum Scott.

As jy nie ’n musiekkunstenaar was nie, watter ander beroep sou jy nastreef?
Ek het binnehuise ontwerp geswot. Ek verkies die sang, maar ek sou ook daarvan hou om ontwerpwerk te doen.

 

Nuwe episodes van Die Kontrak sal elke Woensdag om 20:00 uitgesaai word met heruitsendings op Sondae om 18:00. Die JOOX-app, die Suid-Afrikaanse stroomdiens met die meeste Afrikaanse inhoud, is die amptelike stroomvennoot van Die Kontrak.