Coleske Artists (2018)
[yasr_overall_rating]
Tarryn Lamb, die voormalige hoofsanger van die uiters gewilde pop-country trio, BlackByrd, het vroeër vanjaar die Afrikaanse musiekbedryf amptelik betree met haar debuut solo-album Mal oor Jou, wat onlangs vrygestel is. Dit volg na die ongekende sukses wat sy sedert 2012 saam met Tasmyn Maker en Axene Chaberski-Loubser behaal het met hulle debuut album, Strong, wat vir vier SAMA-nominasies benoem is. Hierdie sangeres met die fluweelstem wat plaaslike gehore reeds die afgelope twee jaar by Classics-konserte bekoor het, sal ook vanjaar vir die heel eerste keer op die gesogte Afrikaans Is Groot-verhoog te sien wees.
Die klassieke album omslag deur Keyart Services maak van pienk en wit as deurlopende kleurskema teen ’n donker agtergrond gebruik om die vroulike perspektief op die ligte sowel as die skadukant van liefde te beklemtoon. Mal oor Jou se vervaardiging is behartig deur Juan (Floors) Oosthuizen, Robin Kielly, Danny Smoke en Crighton Goodwill wat saam met Paulo Azevedo en Arnold Coleske ook vir die finale meng daarvan verantwoordelik was. Al die oorspronklike snitte op hierdie album kom uit die veelbekroonde pen van die talentvolle Johan Oberholzer met die uitsondering van Dit is my storie wat Ewald Coleske geskryf het.
Die titelsnit, Mal oor Jou is ’n meesleurende liefdesverklaring wat beloof om selfs die mees geharde hart weer in die liefde te laat glo. Vier Woorde, die eerste enkelsnit vanaf hierdie album dien as ’n ode aan verlore liefde, gebroke harte en vergete beloftes. Geheueverlies maak van ’n intertekstuele verwysing na die Bybelse verhaal van die wyse en dwase man gebruik in ’n poging om die skrywer se gevoelens oor ’n gewese verhouding te verwoord.
Hierdie album bevat die effens speelse duet, Afgrond, saam met Jay du Plessis sowel as Tarryn en Kevin Leo se Italiaanse verwerking van Ed Sheeran se treffer, Perfect, waaroor luisteraars ongetwyfeld gaande sal wees. Haar deernisvolle vertolkings van legendariese Afrikaanse treffers soos Ek wil vir jou van Christa Steyn, Jy is te dierbaar van Kupido en Blouberg se strand van Laurika Rauch sluit dié emosiebelaaide album op ’n hoogtepunt af.
Die byna akoestiese aanslag sowel as die sensuele aard wat Tarryn se musiek aanneem, word deur Devereaux van der Hoven-Oosthuizen op klavier, Juan (Floors) Oosthuizen en Danny Smoke op kitaar asook baskitaar bewerkstellig. Ricus Nel verleen egter met sy banjo en baskitaar ’n baie meer country-geïnspireerde styl aan al die snitte met ’n vinniger tempo.
Dié album bied ’n realistiese blik op die liefde sowel as verhoudings in teenstelling tot die meeste kommersiële albums se soetsappige sprokiesverhaal weergawe daarvan waarmee luisteraars voortdurend gebombardeer word. Alhoewel Tarryn se stem in baie opsigte aan die van Riana Nel herinner, slaag sy egter met haar unieke benadering tot die country-pop genre daarin om vir haarself ’n regmatige plek binne die Afrikaanse mark te kan verseker. Mal oor Jou met sy aangrypende melodieë en betekenisvolle lirieke sal aanklank vind by elkeen wat al ooit sy of haar hart op iemand verloor het en dit dan met moeite weer terug moes vind.