FOTO: Verskaf
Die 19-jarige Tasha van Middelburg in Mpumalanga is die volgende deelnemer in VIA (DStv-kanaal 147) en Coleske Artists se werklikheidsreeks, Die Kontrak, om huis toe te gaan. Maar eers beantwoord sy so ’n paar vrae:
Wat het jou laat besluit om in te skryf vir Die Kontrak?
Dit was nie eintlik my besluit nie! Ek het al baie teleurstellings gehad in die musiekbedryf. Iemand in die kerk het na my toe gekom en vir my gesê, “Hoor hier, Natasha, ek het hierdie ding gesien: Die Kontrak. Miskien moet jy inskryf.” Ek het toe nie weer daaraan gedink nie – totdat my ma my begin aanspoor het om in te skryf. Kort voor die inskrywings gesluit het, het ek een van my fotograafvriende gevra om my te help om my oudisievideo te skiet. En die terugvoering op die oudisievideo was toe great! Ek het dit glad nie verwag nie.
Wat is jou grootste hoop vir jou musiekloopbaan?
My doel is net om myself daarbuite te kry. Ek wil net graag ’n boodskap oordra van wie ek is en wat ek doen. Die emosie wat ek voel en die passie wat ek het, wil ek baie graag vir mense wys – en ek wil hê hulle moet voel wat ek voel. Ek wil hê hulle moet die liefde vir die musiek ervaar soos ek dit ervaar.
En wat is jou grootste vrees?
My grootste vrees is dat ek dit nie gaan kan doen nie, want dit is my grootste droom vandat ek kan onthou. My grootste vrees is dat musiek nie my lewe kan wees nie.
Watter kunstenaars is jou grootste musikale invloede?
Cher het my baie geïnspireer. Ek hou ook baie van Ed Sheeran, The Lumineers en Mumford & Sons.
As jy nie ’n musiekkunstenaar was nie, watter ander beroep sou jy nastreef?
Ek sou graag ’n lewensafrigter wou wees. Ek was op laerskool baie geboelie so ek wil graag ’n sterk boodskap met die wêreld deel oor wat in ons samelewing aangaan. Ek sou graag mense wou help.
Nuwe episodes van Die Kontrak sal elke Woensdag om 20:00 uitgesaai word met heruitsendings op Sondae om 18:00. Die JOOX-app, die Suid-Afrikaanse stroomdiens met die meeste Afrikaanse inhoud, is die amptelike stroomvennoot van Die Kontrak.