FOTO: Verskaf
In die jongste aflewering van VIA (DStv-kanaal 147) en Coleske Artists se werklikheidsreeks, Die Kontrak, is die 20-jarige onderwysstudent van Uitenhage, Tyral-Lee Miggels se kontrak deur die grootbaas opgeskeur.
Sy het so ’n paar vrae beantwoord:
Wat het jou laat besluit om in te skryf vir Die Kontrak?
Vier dae voor die inskrywings gesluit het, het my suster vir my gesê, “Hoor hier: Daar’s ’n kompetisie. Skryf in!” Ek het my oudisievideo op die nippertjie op die NetNuus-app gelaai.
Wat is jou grootste hoop vir jou musiekloopbaan?
Ek wil graag meer blootstelling kry en mense wys wie ek is en wat ek kan doen. Ek wil mense hoop gee. Ek wil wys al dink mense jy is niks, kan jy ’n verskil maak – al is dit hoe klein.
En wat is jou grootste vrees?
Om in hoë hakke te loop!
Watter kunstenaars is jou grootste musikale invloede?
Beyoncé, Mariah Carey en Sam Smith. Corlea Botha is vir my soos die Beyoncé van Afrikaanse musiek. En natuurlik ook Tarryn Lamb, nie net omdat sy my mentor is nie, maar as gevolg van haar musiek en hoe sy skryf. Toe sy nog saam met Blackbyrd was, het ek baie hulle musiek geluister. Hulle liedjies was oor die bemagtiging van vroue. As kind was ek op skool geboelie oor my ouers se werk: My ouers het ’n stalletjie. Mense het my gespot en gesê hulle het nie ’n regte werk nie, dat ons arm is en dat ons niks het nie. Maar Blackbyrd se liedjie “Keep on” het my oë oopgemaak en ek het besef ek het ’n doel in die lewe en ek moet nie na negatiewe menings luister nie.
As jy nie ’n musiekkunstenaar was nie, watter ander beroep sou jy nastreef?
Definitief onderwys. Ek voel ek kan met kinders iets doen in die lyn van musiek. Ek sou graag ’n kooronderwyser wou word. Solank daar musiek betrokke is, is ek gelukkig.
Nuwe episodes van Die Kontrak sal elke Woensdag om 20:00 uitgesaai word met heruitsendings op Sondae om 18:00. Die JOOX-app, die Suid-Afrikaanse stroomdiens met die meeste Afrikaanse inhoud, is die amptelike stroomvennoot van Die Kontrak.