SPAR Kirkwood Wildsfees 2018: Gebore om wild te wees!

FOTO: Facebook

Drie dae van Born to be Wild-ervarings vir die hele familie by die jaarlikse SPAR Kirkwood Wildsfees is die perfekte begin van die winter-skoolvakansie.

Dié fees, wat aangebied word in die sprokiesmooi Sondagsriviervallei net buite Port Elizabeth, word vanjaar van Vrydag, 29 Junie tot Sondag, 1 Julie aangebied. Die fees is immers ook aangewys as een van die gewildste feeste in Suid-Afrika en een wat iets vir die hele familie aanbied.

Van negeuur die oggend kan feesgangers rondsnuffel deur meer as 350 stalletjies en hul smaakkliere kielie met varsgemaakte produkte. Dít terwyl die jongspan hulself besig hou by die Kersfees-werkswinkel.

Feesgangers kan weer uitsien na ’n wilde musiekprogram met van hul gunsteling sterre soos hulle nog nooit gehoor is nie – op ’n verhoog met die beste klank en beligting in Afrika.

Kunstenaars soos Leah, Fatman, Caroline Grace, Kurt Darren, Jan Bloukaas, Koos Kombuis, Jay, Lianie May, Snotkop, Joe Foster, Tussen Sterre, Dirk van der Westhuizen en vele meer gaan op die verhoog te sien wees.

Van die gunsteling ervarings sluit in die spesiale Kindersone, die “Walk on the Wildside”-ervaring, skaapkop-langtafel, sybokhaar-ekspo, kookdemonstrasies, wynstalletjies en die buitelug-ekspo.

Gesels gerus verder saam op Facebook, Twitter en Instagram.