Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!

Jannie en Corlea: Unforgettable

Coleske Artists (2017)

Jannie Moolman en Corlea Botha se splinternuwe duet-album, Unforgettable, doen sy naam gestand deur luisteraars op ’n onvergeetlike reis deur van die mees gewilde liefdesliedjies van alle tye te neem. Dié nie-amptelike sangpaar se konsepalbum wat onlangs by Classics Is Groot 2017 bekend gestel is, volg kort op die sukses van hul eerste duet album, Alle paaie lei na Rome (2015). Nadat hulle met ’n duet van The Prayer hul debuut saam by die Klein Karoo Nasionale Kunstefees in 2011 gemaak het, was hulle ook gereeld saam op die verhoog by die Afrikaans Is Groot konserte.

Jannie en Corlea is egter albei kunstenaars in eie reg wat onderskeidelik reeds diep spore in die plaaslike sowel as die internasionale musiekbedryf getrap het. Jannie wat reeds sedert die vroeë negentigerjare as ’n tenoor in verskeie bekende operas wêreldwyd te sien was, het ook saam met die veelbekroonde sangeres, Rina Hugo groot welslae bereik. Corlea wie se debuutalbum, Wonderkind van die Millenium op 12-jarige ouderdom reeds uitgereik is, het ook reeds diep spore in die musiekbedryf getrap.

Unforgettable waarvoor Irving Gordon die woorde en musiek geskryf het, is gekies as die titelsnit van Jannie en Corlea se tweede album wat uit vyftien alombekende romantiese treffers van die afgelope eeu bestaan. Hulle vertolking van geliefde snitte soos onder andere Love changes everything, Always on my mind, Can’t help falling in love en Quando quando sal luisteraars na hul asems laat snak. ’n Swing Medley bestaande uit die treffers, Fly Me to the Moon, Ain’t that a kick in the head en Come Fly With Me maak ook deel uit van dié album. Dit word afgesluit met hul weergawe van James Horner en Will Jennings se liedjie, I want to spend my lifetime loving you wat luisteraars ongetwyfeld nog lank sal bybly nadat die laaste note weggesterf het.

Gerhard van Rooyen se klassieke ontwerp van die omslag waarop Jannie en Corlea onderskeidelik in ’n deftige snyerspak en aandrok verskyn, komplementeer beslis die stylvolle musiek wat luisteraars op dié album kan verwag. Die kitaarmeester, Juan Floors Oosthuizen sowel as die strykers, Evert van Niekerk, Lizelle le Roux, Leonie Greyling en Waldo Luc Alexander is die musikante wat aan hierdie album luisterryke skoonheid verleen. Arnold Coleske, Paulo Azevedo en Christie Schutte was vir al die geliefde snitte se opname, redigering en meng verantwoordelik terwyl Juan Floors Oosthuizen en Danny Smoke die verwerkings en produksie daarvan behartig het.

Alhoewel hierdie album geen oorspronklike materiaal bevat nie, dien dit nietemin as ’n vertoonvenster vir die vokale reikwydte, harmonisering en interpretasievermoë van Jannie en Corlea wat daarop gehoor kan word. Dit bied ’n perfekte kombinasie van klassieke en kontemporêre musiek wat nie net luisteraars se liefdesvlam hoog sal laat brand nie, maar ook ’n tikkie nostalgie by hulle sal aanwakker. Unforgettable is ’n tydlose album waarby enigeen met ’n waardering vir die estetiese aanklank sal vind, ongeag of jy reeds ’n aanhanger van hierdie twee supersterre is al dan nie.