Eers sien jy die baard, dan die tattoos, daarna hoor jy die stem – en jy is betower. Dís hoe baie mense hul eerste ontmoeting met hierdie opwindende nuwe kunstenaar op die Afrikaanse musiektoneel beskryf. Dan besef jy Jo Black het binne twee maande vermag wat baie ander hom beny – hy laat mense regop sit, en notisie neem. Jo verkondig ’n boodskap van hoop, ’n boodskap wat duidelik resoneer onder Afrikaanse mense van alle ouderdomme.
Lees ook: Ons liedjie van die jaar is…
Met die bekendstelling van sy eerste treffer, Skepe, in Desember 2016, het hy beslis nie verwag dat die video twee maande later al amper op een miljoen trefslae sal sit nie. Dis amper ongehoord. Maar mense het onder mekaar gepraat, die woord het versprei, en nou is Jo Black op die punt waar hy sy debuutalbum aan die einde van Maart kan uitreik. Nie net het Skepe die nommer 1 posisie op die iTunes Afrikaanse trefferslys behaal nie, maar ook op verskeie radiostasies. En dis wanneer Jo die liedjie voor ’n lewendige gehoor sing, wat jy kan sien hoe almal elke woord saamsing. Boonop geniet hy ook reeds ’n groot aanhang onder die jongklomp danksy die positiewe boodskap van sy Be That Guy –Everyday heroes optredes by meer as 170 skole.
Luister na Skepe op Apple Music:
Voor die volle album einde Maart op die rakke verskyn, stel Jo eers die tweede treffer vanaf die CD bekend. Met die titel, Bring Die Hoop Weer Terug, is dit geen verassing dat dit ’n inspirerende liedjie is nie. Boonop sal die liedjie onmiddellik beskikbaar wees aan almal wat die album vooraf bestel op iTunes. Bemarking van die album sal ook verseker dat almal na dese weet van Jo Black, onder andere ’n sosiale media-veldtog, ’n paar moontlike verassings, radio- en TV-onderhoude, en sy eerste KKNK optrede op 8 April 2017. Aanhangers kan sy nuwe enkelsnit luister op Apple Music of iTunes met ’n nasionale bekendstelling op Vrydag, 3 Maart!
Kyk die video hier:
Vir meer inligting oor wat 2017 alles vir Jo Black inhou, volg hom gerus op Twitter, Instagram en Facebook.