Ná elf uitverkoopte Afrikaans is Groot 2016 vertonings in Pretoria, maak dié gewilde konsertreeks ’n draai in die Moederstad – vir ’n vierde keer. Op Vrydag, 17 Maart en Saterdag, 18 Maart is dié konsert by Grand West Casino in Kaapstad te sien.
Bobby van Jaarsveld, Karlien van Jaarsveld, Jannie Moolman, Corlea, Elvis Blue, Dewald Wasserfall, Lianie May, Steve Hofmeyr, Juanita du Plessis, Jay, Karen Zoid, Laurika Rauch, Riana Nel en Bok van Blerk is almal saam op één verhoog. Natuurlik wag daar ook so paar ander verrassings op konsertgangers.
Afrikaans is Groot is ’n musiekkonsert wat sedert 2012 aangebied word, en beloof jaarliks om nie net iets vir die oor te bied nie, maar ook iets vir die oog. Goeie klank, uitstekende beligting en artistieke toevoegings maak van die konsert ’n trekpleister vir oud en jonk.
“Die Afrikaanse gemeenskap in die Kaap is baie lojaal teenoor Afrikaanse musiek, daarom het ons besluit om die konsert ook daar aan te bied,” sê Arnold Coleske, organiseerder van die konsert. Volgens Coleske is hierdie nie net ’n konsert nie, dit is ’n fees van musiek.
Dis reeds die vierde konsert wat in die Kaap aangebied word, en nes sy voorlopers, Afrikaans is Groot 2013, 2014 en 2015, wat tans ook Woensdae om 20:00 op kykNET NOU! (DStv-kanaal 146) uitgesaai word, gaan dié vertoning jou laat snak na jou asem.
Kaartjies verkoop jaarliks ook soos soetkoek, en mense moet spring om kaartjies in die hande te kry. Binne ’n paar uur is meeste van dié kaartjies verkoop. “Ons moet elke jaar meer konserte byvoeg, want die publiek soek meer,” vertel Coleske verder. “Konsertgangers is baie lojaal, en ons kry net goeie terugvoer van die publiek.”
Diegene wat reeds die konsert in Pretoria bygewoon het, is vol lof. Clara Smit skryf op Facebook: “Ek was daar, dit was pragtig en die kostuums was asemrowend.” Debbie Ferguson Schoultz het van haar laat hoor, en vertel: “Ons was daar en dit was ongelooflik, sal definitief weer volgende jaar bywoon.” “Mense, dit is ’n belewenis. Gaan definitief weer volgende jaar,” skryf Nana Swart Abrie.
Kaartjies vir Afrikaans is Groot 2016 in Kaapstad vir Vrydag, 17 Maart om 19:00 en Saterdag, 18 Maart om 13:00 en 19:00 is aanlyn beskikbaar by TicketPro.
Bly op die hoogte van Afrikaans is Groot-nuus op Facebook en Twitter.