Afrikaans is Groot 2016 nóg groter

Die finale voorbereidings vir die vyfde Afrikaans is Groot-konserte is reeds volstoom aan die gang en beloof weer ’n buitengewone ervaring vir liefhebbers van Afrikaanse musiek te wees. Die toetrede van die Nederlandse sangsensasie – Amira – gaan ook bydra tot die unieke konsert wat vir vanjaar beplan word.

Die twaalfjarige Nederlandse sanger het die wêreld oorrompel met haar optrede in Holland’s got talent in 2013.

In Junie was sy ook in Suid-Afrika en is meer as een keer staande toegejuig vir haar optrede in die Classics is Groot-konsert. “Die reaksie was so oorweldigend dat ons besluit het om te kyk of sy beskikbaar is,” sê Arnold Coleske van AIG.

Hy het bevestig dat benewens die nege konserte wat al uitverkoop is, twee bykomende konserte vir 17 en 24 November gereël is. Kaartjies vir dié konserte is nou te koop.

Dozi en Ricus Nel vorm ook deel uit van die konsert en sal optree saam met ou staatmakers soos Bobby van Jaarsveld, Steve Hofmeyr, Riana Nel, Elvis Blue, Corlia Botha, Jannie Moolman, Juanita du Plessis en Karlien van Jaarsveld.

In die leeftyd van Afrikaans is Groot gebeur dit gereeld dat gaskunstenaars eenmalig optree, nuwe kunstenaars by die konsert se hoofaanbieding gevoeg word of dat kunstenaars nie verder deel van die program is nie.

As een van die bedryf se suksesvolle kunstenaars het Theuns Jordaan nog elke jaar ’n deel van die program uitgemaak en is verlede jaar ten tyde van die konsert vereer vir sy bydrae tot die musiekbedryf. Daarom is dit vir Afrikaans is Groot jammer dat hy nie weer vanjaar deel van die konsert is nie.

“Jordaan het verkies om kwessies waaroor hy verskil na die hooggregshof vir beslissing te verwys. Afrikaans is Groot het steeds die hoogste agting en respek vir Jordaan as kunstenaar en die deur staan vir hom oop, om soos herhaaldelik versoek, direk met Afrikaans is Groot oor enige kwessie in gesprek te tree. Omdat dit in die hof is, moet die sub judicae reel respekteer word en kan besonderhede nie nou bespreek word nie. Afrikaans is Groot sal beslis die hof se uitspraak respekteer en Afrikaans is Groot hoop van harte dat dit so gou moontlik opgeklaar word. Almal word versoek om met enige gevolgtrekkings te wag totdat die hof uitsluitsel gegee het.” lui ’n persverklaring.

Afrikaans is Groot se sukses spruit juis daaruit dat kunstenaars en hul unieke behoeftes ten volle ondersteun word. Afrikaans is Groot 2016 beloof steeds om ’n onvergeetlike ervaring te wees.