Die Heuwels Fantasties se liriekvideo tref digitale skerms

Die Heuwels Fantasties het ’n paar weke gelede ’n splinternuwe enkelsnit, LED Liefde, uitgereik in aanloop tot die feesseisoen, en tot hul nuwe album wat Maart 2017 uitgereik gaan word.  Die bittersoet liedjie handel oor die groep wat so gereeld op die pad is en hul geliefdes dan meestal net op‘’n skerm kan sien.

Die liedjie se universele tema in hierdie digitale-era, uitsonderlike klank en betekenisvolle lirieke het gou geresoneer by meeste mense.  LED Liefde het vinnig na sy afskop sy verskyning op die iTunes ranglys gemaak en het reeds Jacaranda FM se Top 20 en Bok Radio se Top 40 betreë.

“Die terugvoer op die song is ongelooflik.  Dis boonop merkwaardig om te sien hoe die millennials aanklank vind by die liriese inhoud,” sê Fred den Hartog, die groep se kitaarspeler en vervaardiger.

Jacaranda FM se Martin Bester Drive het hul luisteraars gevra wat hulle van die liedjie dink en het, onder andere, die volgende terugvoering ontvang:

“LED Liefde is die perfekte song vir die tyd wat ons in bly en veral die huidige situasie wat ek en my man in is.  Sy ma-hulle is oorsee, so ons het basies nou ‘n LED Liefde met hulle,” het een luisteraar laat hoor. ’n Ander luisteraar sê weer: “Ek is 22 en wat mens noem ‘n millenial, en dit voel partykeer of mens nie vriende het nie, of net internet vriende het of vriende wat jy nou net sien op jou skerm.  Ek is mal oor die nuwe Die Heuwels Fantasties liedjie, they absolutely nailed it!”


Die Heuwels Fantasties het ook ’n geanimeerde liriek musiekvideo uitgereik wat die tema knap vasvang. Hierdie video is gemaak deur Ruan Vermeulen van bewilder.tv wat ook hul ander geanimeerde musiekvideo, Noorderlig (2010), gemaak het.

Die groep se voorsanger, Pierre Greeff, sê hulle dink dat die liriekvideo die “perfekte begeleiding” is vir waaroor die liedjie handel.  “Die twee loop hand aan hand,” sê hy.

Kyk LED Liefde hier:




Nóg musiek van Die Heuwels Fantasties is onlangs vrygestel. Laurika Rauch het hul treffer, Klein Tambotieboom, saam met groep heropgeneem en vrygestel op haar nuwe album, Die Reis.

“Vir ons is dit ’n groot eer dat iemand van Laurika se statuur gekies het om Klein Tambotieboom op te neem en nog boonop vir ons gevra het om dit saam met haar te sing op die album bucket list stuff,”  sê Pierre.

Die Heuwels groet met die volgende boodskap: “Om die late great Herman Pretorius te quote ‘Gekerfde senuwees almal!’  Wees veilig en lekker met mekaar die vakansie.”

LED Liefde is te kry op iTunes, Google Play en Groot Tunes.

Hier is waar jy nog Die Heuwels Fantasties in aksie kan sien vir 2016:

  • 16 Desember: Mykonos Festival, Langebaan
  • 23 Desember: Hartenbos
  • 31 Desember: New Year’s Eve: Presleys, Pretoria