Die Heuwels Fantasties is terug met ’n splinternuwe nuwe enkelsnit om die einde van 2016 in te wy.
Hunter Kennedy sê dat LED Liefde oor verlange gaan. “Tydens die feesseisoen is daar baie mense wat nie by hulle geliefdes kan wees nie. Moderne tegnologie se kontak is bittersoet. Alhoewel jy met jou mense wat vêr is kan kontak maak en sien op jou LED skerms, doen dit nie veel vir die heimweë nie.”
Hiram Koopman speel saam met Die Heuwels Fantasties op hierdie liedjie. “Hy bring die bons met sy unieke saksofoon spel,” sê Hunter. Hiram verskyn op ’n paar van die liedjies op die nuwe album wat in 2017 vrygestel sal word.
LED Liefde is te kry op iTunes, Google Play en Groot Tunes.
’n Liriek-musiekvideo vir LED Liefde word op 5 Desember 2016 vrygestel.
Hunter vertel dat Die Heuwels Fantasties nog nooit ’n liriekvideo gemaak het nie. “Ons voel die konsep sluit aan by die tegnologiese uitgangspunt. Ons sien self uit om te sien wat bewilder.tv mee op kom.”