Afrikaans is Groot Volume 9

Coleske Artists (2016)

Afrikaans is Groot se suksesresep van eksklusiewe inhoud word weereens vervolmaak op hulle splinternuwe Afrikaans is Groot Volume 9 kompilasie-album wat onlangs vrygestel is. Dié dubbel CD-versameling bevat nie minder nie as nege eksklusiewe liedjies deur onder meer Bobby van Jaarsveld, Monique Steyn, Arno Jordaan, Elvis Blue en vele meer.

Die eerste album word op ’n hoë noot afgeskop deur Bobby van Jaarsveld se splinternuwe enkelsnit, Geloof, Hoop en Liefde met meesleurende lirieke deur die bekroonde liedjieskrywer, Johan Oberholzer. Arno Jordaan verras met ’n splinternuwe treffer, Mars Pluto Venus ook vanuit sy pen wat oud en jonk sal bekoor. Monique Steyn neem jou op ’n reis met haar liedjie, Treine asook Hartseer, haar duet saam met Ruhan van Touch of Class. Nog ‘n aangename verrassing is die hoofsaaklik Engelse groep, Blackbyrd wat op Kalm Voor Die Storm hulle Afrikaanse debuut maak.

Ons Op Ons Eie, die opkomende Afrikaanse rolprent, Jou Romeo se temalied deur Loki Rothman beloof om luisteraars se hartsnare van voor af te tokkel. Douvoordag spog ook met nog ’n treffer, Desembers, spesiaal vir diegene wat nie meer kan wag vir die lang somervakansie om aan te breek nie. Hierdie eksklusiewe material word aangevul deur verskeie ou gunstelinge soos Andriëtte Norman se Sewe Oseane en Kurt Darren se Dans Op Die Tafels om die dansvloere mee aan die gang te hou. Die eerste album word afgesluit deur die immergewilde treffer, Waar Was Jy? deur Karen Zoid wat sy spesiaal vir Huisgenoot se eeufeesviering geskryf het.

Die tweede album word deur Elvis Blue se nuwe enkelsnit, Mooi ingelei wat beloof om luisteraars diep te laat nadink oor waarin die werklike skoonheid van die lewe nou eintlik lê. Hierdie album neem ‘n interessante wending wanneer Die Campbells en Cordelia op hulle nuwe duet, Beloftes hul vokale kragte met ‘n verrassend aangename eindresultaat saamsnoer. Die komiese storieverteller en sanger, Andries Vermeulen verras ook met ‘n ietwat dieper aanslag in sy nuwe liedjie, Harte Vol. Die tweede album word afgerond deur reeds bekende gunstelinge soos die nuweling, Franja du Plessis se Stad Van Verlange en die immergroen Nádine se Skildery.

Afrikaans is Groot Volume 9 is beslis ’n moet vir elke Afrikaanse musiekliefhebber, veral as jy die nuutste treffers eerste wil hoor. Dié dubbel album sorg nie net vir ‘n dubbel-dosis van lekker musiek nie, maar bewys inderdaad ook waarom Afrikaans groot is met die treffer op treffer wat dit aan sy luisteraars bied.