Inhoud Huis Musiek (2016)
[yasr_overall_rating]
Dewald Wasserfall trek ’n splinternuwe baadjie aan op sy derde solo-album wat in Augustus vanjaar vrygestel is, met ’n effens minder ernstige aanslag as waarvoor hy oorspronklik bekend geword het. Dit volg op die suksesvolle hakke van Vergeet wat Jy weet van Liefde sowel as Ek en Jy wat ’n Huisgenoot Tempo, Ghoema- en SAMA-toekenning verower het. Jy is die storm is nes sy voorgangers die draer van hoop, maar hierdie keer wel op ’n heelwat ligter noot as gewoonlik.
Eie aan Dewald se styl is daar weer ’n hele paar treffende ballades oor verlore liefdes soos ’n Jaar na September, As jy iemand liefhet, Jy was reg, Laat die lig inkom en Die ander kant van liefde. Masjiene lewer skerp kritiek op die talle uitdagings wat die hedendaagse, moderne, tegnologiese era dikwels aan verhoudings bied. 1 000 Kerse is Dewald en Karlien van Jaarsveld se opvolg duet na die gewilde My Hart se Hongersnood op sy debuutalbum.
Die titelsnit, Jy is die storm dien as bemoediging vir die luisteraars dat hulle moeilike omstandighede en uitdagings in hul lewens kan trotseer en uiteindelik oorwin. Die album omslag waarop die donker wolke in die agtergrond saampak en die donderstrale rondom Dewald se kop blits, dien as ’n onbetwisbare visuele voorstelling van hierdie belangrike boodskap. In Weg van die Ligte bied hy ’n gestroopte blik op die dikwels ontstuimige lewe van bekendes agter die skerms van die vermaaklikheidsbedryf.
Dewald verras met ’n paar meer lighartige nommers soos Altyd Jonk Bly en Brandewyn Weg van Beautiful waarop sy gehore lekker sal kan kuier. Laasgenoemde vertel die staaltjie van daardie alombekende ou in die kroeg wat na ’n paar drankies ’n bietjie meer spesiaal as gewoonlik voel. Hy het ook sy hand gewaag aan die gewilde Aidos Old Friend wat oorspronklik deur Brett Eldredge en Kim Trebble op die musiekprogram, Nashville uitgevoer is.
Dewald het weereens omtrent die helfte van die dertien snitte op hierdie album alleen geskryf terwyl die res daarvan in samewerking met Johan Vorster en Christoph Kotzé geskryf is. Die kitaarmeester, Danny Smoke het die produksie, vervaardiging en verwerkings behartig terwyl Murray Lubbe vir die finale meng daarvan verantwoordelik was. Juan (Floors) Oosthuizen, Danny Smoke, Vinnie Henrico, Brendan Ross, Elben Schutte en Mathys Maree is van die veel bekroonde musikante wat op Jy is die storm gehoor kan word.
Alhoewel dié album ten opsigte van produksie geensins vir sy twee voorgangers hoef terug te staan nie, kry ’n mens ongelukkig die indruk dat die besondere diepte van hulle lirieke tog wel plek-plek hierop ontbreek. Die ligter trant wat dit volg, behoort nietemin vir hierdie rasperstem ’n splinternuwe groep aanhangers te verseker sonder om die liefhebbers van sy dieper, meer liriek gedrewe aanslag heeltemal te vervreem. Jy is die storm met sy onderliggende tema van hoop sal ongetwyfeld as inspirasie kan dien vir enigeen wat al donker en onseker tye in hulle persoonlike sowel as professionele lewens beleef het.