Juanita Records (2016)
[yasr_overall_rating]
Die 22-jarige Franja du Plessis het die plaaslike musiekbedryf behoorlik storm geloop met haar debuutalbum, My Verhaal wat onlangs vrygestel is. Haar eerste enkelsnit vanaf die album, Stad van verlange is sonder twyfel ’n wegholtreffer wat binne die eerste twee maande na sy vrystelling reeds deur meer as 200 000 mense op YouTube gekyk is. Die dogter van Afrikaanse musiek se platinumprinses, Juanita du Plessis het die afgelope drie jaar bekendheid verwerf waar sy tydens verskeie groot geleenthede die verhoog met haar ma gedeel het.
Die eenvoudige dog stylvolle album omslag deur Marlette Kruger en haar ouer broer Ruan du Plessis waarin sy direk na die luisteraar kyk, getuig van ’n eerlike album sonder fieterjasies. Franja toon uitsonderlike skryftalent met al sestien oorspronklike snitte wat uit haar eie pen kom, iets wat selfs min gevestigde Suid-Afrikaanse kunstenaars haar sal kan nadoen. Sy het as medeskrywer van Kaalvoetkind, Om jou pinkie, Aan hou om aan te hou en Hou op soek op Juanita se vorige twee albums reeds haar skryfvaardighede geslyp.
Die titelsnit, My Verhaal dien heel gepas as ’n uitnodiging aan die luisteraar om Franja se lewensverhaal deur middel van al haar liedjies beter te kan leer ken. Die soet en die suur van verhoudings word albei binne die oorhoofse liefdestema van hierdie album aangespreek. Stad van verlange wat ongetwyfeld vir dae lank in jou kop sal bly vassteek, vertel die verhaal van onbeantwoorde liefde wat na afloop van baie jare weer herroep word. Die meesleurende ballade, Regte een vertel die verhaal van elke mens se soeke na ’n lewensmaat en ’n sielsgenoot waarmee almal sal kan identifiseer. ’n Beter Plek hoop om vertroosting te bied almal wat al ooit ’n geliefde aan die dood moes afstaan en om hulle te help om daarin berusting te vind. Ander potensiële treffers sluit in Ek kan nie ophou kyk, Dra jou hart, Kom klim nou uit, My gunsteling en Mooier as ’n mens. Die album bevat verder ook die lied, In twee geskeur wat spesiaal deur Franja geskryf is vir die musiekrolprent, As jy sing waarin sy die rol van Marna de Jager vertolk het.
Hierdie album wat deur betekenisvolle lirieke sowel as aansteeklike ritmes gekenmerk word, bied ’n groot verskeidenheid liedjies wat ewe goed op die lang pad en die dansbaan ontvang behoort te word. Dit is hoofsaaklik aan Juanita du Plessis, Juan (Floors) Oosthuizen, Murray Lubbe, Stass en Nathan Winckler se uitstekende vervaardiging, verwerking en programmering te danke.
My Verhaal bied ’n unieke mengsel van pop- en country musiek wat plek-plek ’n bietjie aan die moderne aanslag van die Amerikaanse sangsensasie, Taylor Swift herinner. Alhoewel Franja se stem besondere sterk ooreenkomste met die van haar ma toon, het sy egter reeds met haar debuutalbum daarin geslaag om vir haarself ’n onafhanklike musikale identiteit te skep. Die inhoud daarvan beloof om ’n verfrissende nuwe klank na die Afrikaanse musiektoneel te bring wat beslis vir haar ’n nuwe generasie aanhangers sal waarborg.