FOTO: Verskaf
Ná ’n ongelooflike eerste seisoen, duisende inskrywings en ’n wenner wat die musiekindustrie gestormloop het, is Die Kontrak uiteindelik terug. Hierdie keer met ’n paar nuwe gesigte…
Vanjaar sal dié gesogte werklikheidreeks gratis op eTV gekyk kan word.
LEES OOK: Die Kontrak binnekort terug op ’n nuwe TV-kanaal
Die doel van Die Kontrak is om aspirant kunstenaars in die Afrikaanse musiekindustrie te ontwikkel en vir hulle die platform te skep om ’n superster te word. “Met die dat Die Kontrak nou ook op eTV uitgesaai gaan word kan enige iemand met ’n televisie hierdie pad saam met ons stap,” meen Barry Pretorius, een van die kenners op dié program en bekroonde regisseur van Afrikaans is Groot.
Soos met die eerste reeks sal daar weer vier mentors wees wat hul eie deelnemers vanuit die hoopvolle inskrywings kies. Die mentors sal elkeen met ses deelnemers afskop waarvan slegs twee deelnemers deel van die top 8-groep sal vorm.
Die nuwe mentors sal in die laaste week van April op sosiale media aangekondig word. Barry Pretorius, Corlea en Theuns Jordaan sal weer die gesoute kenners van die kompetisie wees.
Die gewilde sanger Bobby van Jaarsveld is vanjaar terug as een van die aanbieders van die tweede seisoen. Hy sal saam met twee nuwe gesigte die kompetisie aanbied.
Die eerste gesig wat by Bobby as mede-aanbieder aansluit is Demi Lee Moore, die wenner van die eerste seisoen in 2018. Demi Lee het die musiekbedryf met haar talent en stem betower en winkels kon nie voorbly met voorraad van haar album Mis eet slaap herhaal.
“Die Kontrak het vir my soveel deure oopgemaak en dit is alles te danke aan die geloof wat Arnold Coleske en sy ongelooflike span in my gehad het. Elke kunstenaar met ’n groot droom, wat bereid is om hard te werk, moet vir hierdie kompetisie inskryf,” het Demi Lee gesê.
LEES OOK: Demi Lee Moore: ‘Die Kontrak het my drome waar gemaak’
“Dit is ’n nuwe uitdaging en nog altyd iets wat ek wou doen! Ek was self in die posisie van elke sanger wat gaan inskryf, ek weet waardeur hulle gaan, hoe hulle voel en ek glo dit sal hulle ook gemakliker maak in die hele proses.”
Bobby en Demi Lee is egter nie die enigste aanbieders nie, want vanjaar is daar drie aanbieders. Die televisie-persoonlikheid en aktrise Pulane Sekepe maak ook deel uit van die program se aanbieding trio. Pulane is geen vreemdeling op die klein- en silwerskerm nie. Sy was al te sien in verskeie plaaslike teaterproduksies en kykers sal haar veral herken vir haar rol as Cecelia in die kykNET-komedie, Die Kasteel en as aanbieder van programme soos Kom Ons Trou Nou en Naweek.
“Ek sien uit om saam met die room van Afrikaanse musiek te werk. Om by hulle almal te leer en om deel te wees van die Die Kontrak-familie,” het Pulane gesê.
Pulane meen dat dit moeilik is om in die vermaaklikheidsindustrie ’n naam te maak. “Dit is amazing dat daar programme soos Die Kontrak is waar nuwe talent raakgesien kan word.”
Bobby verwelkom dié nuwe bloed met ope arme: “Dit is goed vir só ’n produksie, asook vir myself. Ek sien uit om vir Pulane te ontmoet en ek glo dat ons groot pelle gaan raak.”
Inskrywings vir Die Kontrak 2020 open op 1 Mei en ook hier wag ’n paar hase in die hoed wat binnekort op Die Kontrak se sosiale media bekend gemaak sal word.
Die wenner van Die Kontrak stap weg as ’n kunstenaar van die gesogte platemaatskappy, Coleske Artists, wat verantwoordelik is vir die loopbane van die land se grootste kunstenaars.
Gesels gerus saam op sosiale media deur gebruik te maak van die hutsmerk #DieKontrak2 of #WenDieKontrak.