“Musiekliefhebbers by vanjaar se KKNK kan ’n wye spektrum van musiek beleef – van kontemporêr en klassiek, tot kabaret en selfs ’n Afrikaanse musiekblyspel”, sê Rhodé Snyman, uitvoerende hoof van dié fees, wat van 8 tot 15 April op Oudtshoorn aangebied word. “Die musiekprogram in teaters en op die musiekverhoë bied beslis vanjaar iets vir elke smaak”, vertel sy.
In teaters kan feesgangers uitsien na die eerste Afrikaanse hip-hop musiekblyspel Amper Famous, met die jong hip-hop-kunstenaar V.I.T.O., onder regie van David Kramer. Amper Famous vertel die storie van ’n jong man van ’n klein dorpie, wat groot drome droom. Dit beloof om ’n ervaring te wees wat hartsnare gaan roer.
Vir aanhangers van Karen Zoid, die The Voice-mentor en president van die Republiek van Zoid Afrika, én die Gereformeerde Blues Band, is hulle vertoning ’n móét sien. Die musikante trek ’n kontemporêre baadjie vir Johannes Kerkorrel en die Gereformeerde Blues Band se ikoniese protesalbum, Eet Kreef aan.
Ikoniese Afrikaanse musiek word deur Emo Adams, Bobby van Jaarsveld en Katlego Maboe opgetof in Karoo Swing, vir ’n nostalgiese reis vir almal wat lus is om te jol. Kom luister hoe die drie gunstelinge hul liefde vir big band swing deel.
Freshlyground se Zolani Mahola vereer die rol van vrouwees in die wêreld van rock & roll in Rok en rol. Internasionale ikone soos Janis Joplin, Nina Simone, Tina Turner, Cyndi Lauper en plaaslike vroue soos Miriam Makeba, Brenda Fassie, Claire Johnston en Lesley Rae Dowling word gehuldig. Mahola is een van Suid-Afrika se mees geliefde en suksesvolle vroulike sterre in die musiekwêreld.
Coenie de Villiers het ’n splinternuwe musieksuite gekomponeer, wat vir die eerste keer in Karoo Suite gehoor gaan word. Skrywer Deon Meyer is saam met De Villiers op die verhoog en is ook verantwoordelik vir die teks. Projeksies van Meyer se fotografie (nóg ’n talent van dié skrywer) word die agtergrondtafereel vir dié multimedia-viering van woord, beeld en musiek. Saam met hulle op die verhoog is Jaconell Mouton (klavier), David Klassen (perkussie) en Mauritz Lotz (kitare).
Vir kabaret-liefhebbers bied die feesprogram verskeie keuses. Angels on Horseback: Skop skiet and Blonder, Kaapstad se gunsteling-countrykabaret, gee aan country ’n heel nuwe baadjie in dié sexy en satiriese stuk. Fiona du Plooy behartig die regie en Alicia McCormick en Jonathan Tait is onder andere op die verhoog.
Die Vlammende Fez is ’n literêre kabaret en kyk na skrywer I.D. du Plessis se lewe en skryfwerk oor die Kaapse Maleier-kultuur, onder regie van Basil Appolis en met o.a. Chris van Niekerk, Loukmaan Adams en ’n Kaapse Maleier-sanggroep. Kom luister na nuutgeskrewe en 300 jaar oue melodieë, vervleg met verse oor die wêreld van die Kaapse Maleiers.
Jemma Kahn bring die internasionaal-suksesvolle We didn’t come to hell for the Croissants na die fees. Ses hoofsondes (die vervelige een is uitgelaat). Ses Suid-Afrikaanse skrywers. Ses stories wat die sondelose verlei en die onsedelike verstom. Dit is ’n rou vertolking van die antieke Japannese storievertelkultuur, kamishibai, in ’n Suid-Afrikaanse konteks. Die oorspronklike tekste, deur verskillende vooraanstaande jong Suid-Afrikaanse skrywers in Engels geskryf, is spesiaal vir die KKNK na Afrikaans vertaal deur Tertius Kapp. Dit is dié werk se Afrikaanse debuut. De Klerk Oelofse sluit by Kahn op die verhoog aan.
Elisha Zeeman rebelleer in Mond verby teen “the man” wat alewig in ons nekke blaas. In hierdie satiriese sketskomedie deel ses uitspattige karakters hul ervarings oor die korporatiewe wêreld in ’n eenvoudige, maar vlymskerp solovertoning. Zeeman bied hierdie volwaardige kabaret aan na haar suksesvolle Uitkampteater-stuk van 2016.
Vir klavier-musiekliefhebbers, bring Petronel Malan ’n program wat spesiaal vir die KKNK saamgestel is. Kom beleef hierdie verrykende musikale reis met musiek van haar eerste vyf CD’s en ’n voorsmaak van haar volgende album. Malan is een van Suid-Afrika se mees geliefde konsertpianiste, bekend vir kragtige, virtuose klavierspel wat gehore in konsertsale dwarsoor die wêreld betower.
Ander musiekproduksies wat by die KKNK debuteer, sluit in: Amanda Strydom – So onner deur die maan, Andriëtte Norman – Goeie genade dis ’n dekade, Danie Niehaus en Pietman Geldenhuys – Die ding van ’n liedjie, Jak de Priester – 15 jaar met klavier en kitaar, Loki Rothman en Albert Frost – Die akoestiese kitaar en ook optredes deur Steffie le Roux en Les Javan.
“Opelugmusiekkonserte keer vir die eerste keer sedert 2012 terug na die Rivierbuurt en elke aandprogram bring verskeie groot name saam op die Huisgenoot-verhoog”, vertel Snyman. Die volledige aandprogram sluit in: Juanita du Plessis, Bok van Blerk, Refentse, Jo Black, The Black Ties en Elandré Schwartz (8 April); Theuns Jordaan en Dr. Victor & The Rasta Rebels (9 April); The Rockets, Nicholis Louw, Elizma Theron en Brendan Peyper (10 April); Emo Adams, Kurt Darren, Karin Kortjé en Robin Peters (11 April); Bobby van Jaarsveld en Rhema Varrie (12 April); Rymklets van Oos tot Wes met Early B, Die Salwing (HemelBesem, Yoma en Linkris), Jerome Rex, RenoKarooKing, Die Hooflig, Japsnoet en DJ Hearing Aid (13 April); kykNET Jukebox met Pieter Koen, BlackByrd, Refentse, Jay, Leah en Willem Botha (14 April) en Kleurvol met ’n keur van vars nuwe talent (15 April). Toegang na dié konserte is ingesluit by Rivierbuurt-kaartjies.
Deur die dag bied die Rivierbuurt musiek op twee verhoë – die Coca-Cola-verhoog en die Kango Kombuis-verhoog met alles van bands tot agtergrondmusiek. Om 16:00 skuif die musiek na die Huisgenoot-verhoog, waar gunstelinge én opkomende sterre ’n draai maak, voordat die aandprogram afskop. Golden circle-kaartjies vir die Huisgenoot-verhoog is beskikbaar vir 8, 9, 14 en 15 April. Golden circle-kaartjies bied nie toegang tot die Rivierbuurt nie.
Die volledige program is hier beskikbaar. Kaartjies kan by Computicket, Shoprite/Checkers en House & Home gekoop word. Verblyfbesprekings kan aanlyn gedoen word, of kontak 044 203 8600. Die feesdatums val vanjaar binne die nasionale skoolvakansie en eindig oor Paasnaweek.