Die bekroonde Afrikaanse musiekgroep Spoegwolf is terug met hul vyftiende album, “Kleiner”, wat pas op alle groot stroomdienste uitgereik is. Dié album bevat tien snitte en neem luisteraars op ’n emosionele reis deur die klein, dikwels ongesiene oomblikke in die lewe wat uiteindelik die grootste betekenis dra.
Ná ’n jaar se werk aan wat die groep as hul malste album nóg beskryf, het maande se afronding, kreatiewe jam-sessies en gedeelde drome saamgevloei tot ’n album wat beloof om luisteraars tot in hul binneste te raak.
“Kleiner” is ’n konsep-album wat die kollig verskuif na dit wat maklik ongemerk by ’n mens verbygaan. Dit is ’n viering van die eenvoudige, die persoonlike en die betekenisvolle – die dinge wat dalk klein lyk, maar dikwels die grootste impak op ons lewens het.
“Woorde wat sny. Instrumente wat streel. Dromme wat binne jou klop,” sê die groep se voorsanger, Danie du Toit, oor die album.
Die resultaat is ’n versameling musiek wat getuig van Spoegwolf se vermoë om eerlike emosie met kragtige lirieke en kenmerkende instrumentale klanke te verweef. Soos die titel aandui, lê die album se krag juis in die dinge wat ’n mens nie altyd dadelik raaksien nie, maar wat lank ná die laaste noot by jou bly.
“Kleiner” bevat ook twee samewerkings wat ’n vars dimensie aan die album verleen. Die eerste is “Eerste Liefde” saam met Demi Lee Moore, wat twee geliefde stemme uit die Afrikaanse musiekbedryf bymekaarbring. Die album bevat ook ’n samewerking met Oupa Danie, wat verdere kleur aan dié nuwe hoofstuk in Spoegwolf se musiekreis gee.
Die album is nog ’n mylpaal vir ’n groep wat oor die jare ’n unieke plek in die Afrikaanse musieklandskap verower het. Spoegwolf is bekend daarvoor dat hulle musiek nie bloot as liedjies beskou nie, maar as ’n omvattende kunsvorm waarin klank, beeld en lewendige optredes saamwerk om ’n groter ervaring te skep.
Aanhangers kan ook uitsien na die musiekvideo vir “Christen”, wat onlangs uitgereik is. Die video neem kykers terug na die immergewilde Spoegwolf Op Ys-konsert wat vroeër vanjaar by die SunBet Arena in Pretoria aangebied is en bied ’n blik op die energie en omvang van dié besonderse lewendige produksie.
https://youtu.be/-x0aMX3mlzs
Die groep keer op 6 Augustus 2027 terug na die SunBet Arena vir die derde aflewering van die gewilde Spoegwolf Op Ys-konsert. Ná die sukses van die vorige vertonings beloof die volgende konsert om weer ’n groot hoogtepunt op die groep se kalender te wees.
Kaartjies vir Spoegwolf Op Ys 2027 is nou beskikbaar by iTickets.
Met “Kleiner” bewys Spoegwolf opnuut dat groot emosie nie altyd uit groot gebare spruit nie. Soms is dit juis die klein dinge, die woorde wat ons nie sê nie en die oomblikke wat ons amper mis, wat die diepste spore laat.
Spoegwolf bestaan uit Danie du Toit, Moskou du Toit, Albert van der Merwe en Chris von Wielligh.